नासाउ काउन्टीका ब्रुस ब्लेकम्यानले न्यूयोर्क गभर्नर चुनावमा उम्मेदवारी घोषणाकाे तयारी, ट्रम्पका सहयोगीबीच प्रतिस्पर्धा
न्यूयोर्क- न्यूयोर्कको लङ्ग आइल्याण्ड उपनगरका रिपब्लिकन अधिकारी तथा नासाउ काउन्टी कार्यकारी ब्रुस ब्लेकम्यानले गभर्नर चुनावमा उम्मेदवारी घोषणा गर्ने तयारी गरेका छन्। यससँगै राष्ट्रपति डोनाल्ड ट्रम्पका दुई सहयोगीबीच तीव्र प्रतिस्पर्धा हुने देखिएको छ।
अमेरिकी सांसद एलिस स्टेफानिकले गत महिना नै उम्मेदवारी घोषणा गरिसकेकी छन्। ब्लेकम्यानको प्रवेशले रिपब्लिकन प्राथमिक चुनावलाई अझ चर्को बनाउने अनुमान गरिएको छ।
ट्रम्पले पत्रकारसँग प्रतिक्रिया दिँदै “उनी महान छन्, उनी पनि महान छन्” भन्दै ब्लेकम्यान र स्टेफानिक दुवैलाई समर्थनजनक टिप्पणी गरे तर पक्ष नलिने संकेत दिए।
ब्लेकम्यानले ट्रान्सजेन्डर खेलाडीलाई काउन्टी खेलकुद सुविधामा प्रवेश निषेध गर्ने नीति ल्याएर ध्यान खिचेका छन्। उनले स्वयंसेवी सुरक्षा इकाई स्थापना गरेका छन्, जसलाई आलोचकहरूले ‘मिलिशिया’ भनेका छन्।
स्टेफानिक उत्तरी न्यूयोर्कको एक कन्भरभेटिभ निर्वाचन क्षेत्र प्रतिनिधित्व गर्छिन्। उनले संयुक्त राष्ट्रसंघमा राजदूत बन्ने ट्रम्पको प्रस्ताव फिर्ता भएपछि गभर्नर चुनावमा उम्मेदवारी घोषणा गरेकी हुन्।
स्टेफानिकको अभियान प्रवक्ता बर्नाडेट ब्रेसलिनले ब्लेकम्यानलाई कमजोर उम्मेदवार भन्दै “उनले आफ्नो अहंकारलाई अगाडि राखेर क्याथी होचुललाई सहयोग गरिरहेका छन्” टिप्पणी गरे।
डेमोक्र्याट गभर्नर क्याथी होचुल पुनःनिर्वाचनमा उम्मेदवार बनेकी छन् तर आफ्नै उप–गभर्नर एन्टोनियो डेलगाडोसँग प्राथमिक प्रतिस्पर्धा सामना गर्दैछिन्।
