थाई प्रधानमन्त्रीले संसद विघटन गर्दै ४५–६० दिनभित्र निर्वाचन घोषणा
थाइल्यान्ड- थाइल्यान्डमा प्रधानमन्त्री अनुटिन चार्नभिराकुलले संसद विघटन गर्दै आगामी ४५ देखि ६० दिनभित्र आम निर्वाचन हुने घोषणा गरेका छन्।
शुक्रबार प्रकाशित राजकीय आदेशमा उनले क्याम्बोडियासँगको घातक सीमा विवादलगायत चुनौतीहरूलाई आफ्नो अल्पमत सरकारले नियन्त्रण गर्न नसकेको उल्लेख गर्दै “संसद विघटन जनतालाई राजनीतिक शक्ति फर्काउने उपाय हो” भनेका छन्।
अनुटिन गत सेप्टेम्बरमा पदभार ग्रहण गरेका थिए। तर हाल विपक्षी पीपल्स पार्टीको समर्थन गुमाएपछि र विश्वासको मत असफल हुने सम्भावनाले उनले निर्वाचन अघि सारेका हुन्।
उनको भुमजथाई पार्टीलाई दक्षिण थाइल्यान्डमा आएको बाढी व्यवस्थापनमा कमजोरी देखिएको भन्दै आलोचना गरिएको छ, जसमा कम्तीमा १७६ जनाको मृत्यु भएको थियो।
संसद विघटनको आदेश राजा महा वजिरालोङ्कोर्नले अनुमोदन गरेका छन्। आदेशमा अनुटिनले अल्पमत सरकार र अस्थिर राजनीतिक परिस्थितिका कारण प्रभावकारी प्रशासन सम्भव नभएको बताएका छन्।
पीपल्स पार्टीले संविधान संशोधन र चार महिनाभित्र संसद विघटनको माग गरेको थियो। माग पूरा नभएको भन्दै पार्टीले विश्वासको मत प्रस्ताव ल्याउने तयारी गरेको थियो।
थाइल्यान्ड पछिल्लो वर्षदेखि राजनीतिक अस्थिरतामा छ, जहाँ दुई प्रधानमन्त्रीलाई अदालतले नैतिकता उल्लङ्घनको आरोपमा पदच्युत गरिसकेको छ।
