अदालती आदेशपछि किल्मार अब्रेगो गार्सिया आप्रवासन हिरासतबाट मुक्त
न्युयोर्क- अमेरिकी अदालतको आदेशपछि एल साल्भाडोरका किल्मार अब्रेगो गार्सियालाई आप्रवासन हिरासतबाट रिहा गरिएको छ। अमेरिकी जिल्ला न्यायाधीश पौला जिनिसले ट्रम्प प्रशासनले उनलाई “कानूनी अधिकार बिना” हिरासतमा राखेको ठहर गर्दै तत्कालै देश निकाला गर्न नसकिने आदेश दिएकी हुन्।
गार्सिया अमेरिकी नागरिकसँग विवाह गरेर म्यारिल्यान्डमा वर्षौँदेखि बस्दै आएका छन्। उनी किशोरावस्थामा अवैध रूपमा अमेरिका प्रवेश गरेका थिए। मार्चमा गल्तीवश एल साल्भाडोर फिर्ता पठाइएपछि पुनः अमेरिका ल्याइएका थिए।
न्याय विभागले यस आदेशविरुद्ध अपिल गर्ने अपेक्षा गरिएको छ। तर आदेशले उनलाई कम्तीमा अस्थायी रूपमा परिवारसँग फर्कन अनुमति दिएको छ। उनका वकिलले यसलाई “सकारात्मक मोड” भएको बताएका छन्।
गृह सुरक्षा विभागले भने आदेशलाई “नाङ्गो न्यायिक सक्रियता” भन्दै आलोचना गरेको छ।
यो मुद्दा ट्रम्प प्रशासनको आप्रवासन कडाइको केन्द्रबिन्दु बनेको छ। प्रशासनले गार्सियालाई MS-13 गिरोहसँग सम्बन्धित आरोप लगाएको छ, जुन उनले अस्वीकार गरेका छन्।
२०१९ मा अदालतले उनलाई आफ्नै देशमा गिरोहबाट उत्पीडनको सम्भावना रहेको भन्दै निर्वासन रोक्ने आदेश दिएको थियो। तर मार्चमा प्रशासनले उनलाई एल साल्भाडोर पठाएपछि सर्वोच्च अदालतले पुनः अमेरिका ल्याउन आदेश दिएको थियो।
गार्सियालाई पछि टेनेसीमा मानव तस्करी आरोपमा पक्राउ गरिए पनि उनले दोषी नभएको दाबी गरेका छन्।
न्यायाधीश जिनिसले आदेशमा भनेकी छन्, “आप्रवासन हिरासतलाई दण्डको रूपमा प्रयोग गर्न सकिँदैन, न त यसलाई अनिश्चितकालसम्म जारी राख्न सकिन्छ।” उनले कोस्टारिकाले गार्सियालाई पुनः बसोबास गर्न स्वीकार गर्ने प्रस्तावलाई सरकारको अस्वीकारलाई पनि उल्लेख गरेकी छन्।
