आठ राज्यमा आप्रवासीलाई दिइएका व्यावसायिक ड्राइभर लाइसेन्समा समस्या,न्यूयोर्कमा धेरै अवैध

न्यूयोर्क- अमेरिकामा आप्रवासीलाई दिइने व्यावसायिक ड्राइभर लाइसेन्स सम्बन्धी संघीय सरकारको कडाइले हालसम्म आठ राज्यमा समस्या देखिएको छ।

क्यालिफोर्नियामा २१ हजारभन्दा बढी लाइसेन्स रद्द गरिएको छ भने अंग्रेजी भाषा दक्षता परीक्षण लागू नगरेको भन्दै ४० मिलियन डलरको फन्ड रोकिएको छ। पेन्सिलभेनियामा करिब १२ हजारभन्दा बढी आप्रवासी ड्राइभरको लाइसेन्स पुनः समीक्षा गर्न आदेश दिइएको छ। मिनेसोटामा २,११७ लाइसेन्समा त्रुटि भेटिएको छ भने न्यूयोर्कमा ३२ हजार सक्रिय लाइसेन्समध्ये धेरै अवैध रूपमा जारी भएको पाइएको छ।

टेक्सासमा आधा भन्दा बढी लाइसेन्स त्रुटिपूर्ण देखिएको छ र १८२ मिलियन डलर फन्ड जोखिममा परेको छ। साउथ डकोटामा अस्थायी पेपर लाइसेन्स एक वर्षसम्म वैध हुने समस्या भेटिएको छ। कोलोराडोमा कम्प्युटर प्रणालीको त्रुटिले चार वर्षे लाइसेन्स जारी भएको छ र १८ जना मेक्सिकन नागरिकलाई अवैध रूपमा लाइसेन्स दिइएको पाइएको छ। वासिङ्टनमा ६८५ आप्रवासीलाई गलत प्रकारको लाइसेन्स दिइएको छ।

यी सबै घटनाले आप्रवासी ट्रक चालकहरूको भविष्य अनिश्चित बनाएको छ। ट्रम्प प्रशासनले अंग्रेजी भाषा दक्षता अनिवार्य गर्ने र गैर–नागरिकलाई CDL दिने नियम कडाइ गर्ने प्रयास गरिरहेको छ, तर अदालतले नयाँ नियमलाई अस्थायी रूपमा रोकिदिएको छ।

हालै भएका घातक दुर्घटनापछि संघीय सरकारको ध्यान अझ बढी केन्द्रित भएको छ र राज्यहरूलाई तुरुन्तै सुधारात्मक कदम चाल्न दबाब दिइएको छ।