क्यानडामा ‘लस्ट क्यानाडियन’ नागरिकता विधेयक लागू
न्युयोर्क- क्यानडाले अब विदेशमा जन्मिएका वा दत्तक लिएका बालबालिकालाई स्वतः नागरिकता दिने व्यवस्था लागू गरेको छ, यदि उनीहरूको अभिभावक पनि विदेशमै जन्मिएका भए पनि। तर अभिभावकले कम्तीमा तीन वर्ष क्यानडामा बसोबास गरेको प्रमाण देखाउनुपर्नेछ।
‘लस्ट क्यानाडियन’ भनिने समूहमा ती व्यक्तिहरू पर्दछन्, जो पुराना कानुनी प्रावधानका कारण नागरिकता गुमाएका वा कहिल्यै प्राप्त गर्न नसकेका थिए। नयाँ नियम सन् २०२३ मा ओन्टारियो उच्च अदालतले नागरिकता सम्बन्धी कानुनका केही प्रावधान असंवैधानिक ठहर गरेपछि आएको हो।
सन् २००९ मा तत्कालीन प्रधानमन्त्री स्टिफन हार्परको सरकारले विदेशमा जन्मिएका क्यानाडेली सन्तानलाई स्वतः नागरिकता दिने अधिकार हटाएको थियो। तर हालको लिबरल सरकारले अदालतको निर्णयविरुद्ध अपिल नगरी नयाँ व्यवस्था स्वीकार गरेको हो।
क्यानडाको पार्लियामेन्टरी बजेट अफिसरको अनुमानअनुसार आगामी पाँच वर्षमा करिब १ लाख १५ हजार मानिस यसबाट प्रभावित हुनेछन्।
यस विधेयकविरुद्ध कन्जर्भेटिभ सांसद मिशेल रेम्पेल गार्नरले ‘अनियन्त्रित नागरिकता’ हुने भन्दै चिन्ता व्यक्त गरेकी थिइन्। कन्जर्भेटिभ र ब्लक क्युबेक्वा दलले भाषा दक्षता र सुरक्षा जाँच जस्ता थप कडाइका माग गरेका थिए, तर ती संशोधन पारित भएनन्।
नयाँ व्यवस्थाबाट लाभ उठाउनेमध्ये एक ब्रिटिश जन्मिएका फुटबल खेलाडी अल्फी जोन्स हुन्, जसलाई २०२६ फिफा विश्वकपका लागि क्यानाडाले भर्ती गरेको छ। उनको हजुरआमा अल्बर्टा प्रान्तकी हुन्।
