जनवरीदेखि विद्यार्थी ऋण तिर्न नसकेका अमेरिकनको तलब काट्न सुरु गर्ने ट्रम्प प्रशासन

न्यूयोर्क – अमेरिकी शिक्षा विभागले जनवरीको पहिलो सातादेखि विद्यार्थी ऋण तिर्न नसकेका करिब १,००० जनालाई तलब काट्ने सूचना पठाउने तयारी गरेको छ। यसअघि कोभिड महामारी सुरु भएपछि ऋण संकलन गतिविधि रोकिएको थियो, त्यसयता पहिलोपटक तलब काट्ने प्रक्रिया सुरु हुन लागेको हो।

सरकारसँग संघीय ऋण संकलनका विशेष अधिकार छन्। यसले कर फिर्ता, तलब, सामाजिक सुरक्षा भत्ता तथा अपाङ्गता लाभसमेत जबरजस्ती काट्न सक्छ। शिक्षा विभागले ऋणीको कर कटिसकेको आयको १५ प्रतिशतसम्म तलब काट्न सक्नेछ। तर कानुनअनुसार ऋणीलाई कम्तीमा हप्तामा २१७.५० डलर (संघीय न्यूनतम ज्यालाको ३० गुणा) बाँकी राख्नुपर्नेछ।

हाल अमेरिकामा ५ मिलियनभन्दा बढी विद्यार्थी ऋणधारीहरू डिफल्टमा छन्। शिक्षा विभागले यो संख्या चाँडै १० मिलियनसम्म पुग्न सक्ने चेतावनी दिएको छ। कुल विद्यार्थी ऋणधारी संख्या ४२ मिलियनभन्दा बढी छ भने बक्यौता ऋण १.६ ट्रिलियन डलर नाघिसकेको छ।

विशेषज्ञहरूले कमजोर श्रम बजार, ऋण प्रणालीमा निरन्तर परिवर्तन र राहत कार्यक्रम पहुँचमा समस्या भएकाले ऋणधारीहरू थप दबाबमा परेको बताएका छन्।

उपभोक्ता अधिकारकर्मीहरूले ऋणधारीलाई तलब काटिन नदिन सरकारको Default Resolution Group सँग सम्पर्क गर्न, ऋण पुनर्वास (loan rehabilitation) जस्ता कार्यक्रममा सहभागी हुन र ऋणलाई अद्यावधिक गर्ने विभिन्न उपाय अपनाउन आग्रह गरेका छन्।