नाजी प्रतीक प्रदर्शन गरेको आरोपमा ब्रिटिश नागरिकलाई अस्ट्रेलियाबाट निर्वासनको तयारी

सिड्नी – अस्ट्रेलियामा बसोबास गर्दै आएका ४३ वर्षीय एक ब्रिटिश नागरिकलाई नाजी प्रतीक प्रदर्शन गरेको आरोपमा पक्राउ गरी भिसा रद्द गरिएको छ। उनलाई ब्रिस्बेनमा आप्रवासन हिरासतमा राखिएको छ र जनवरीमा अदालतमा पेश गरिनेछ।

प्रहरीका अनुसार उनले सामाजिक सञ्जालमा स्वस्तिकाको चित्र पोस्ट गर्दै नाजी विचारधारा प्रचार गरेका थिए र यहूदी समुदायविरुद्ध हिंसाको आह्वान गरेका थिए। अस्ट्रेलियामा हालै बढ्दै गएको यहूदीविरोधी गतिविधि र दक्षिणपन्थी उग्रवादलाई नियन्त्रण गर्न प्रहरीले प्रतिबन्धित प्रतीक प्रयोगमा कडाइ गरेको छ।

गृह मामिला मन्त्री टोनी बर्कले भने, “उनी यहाँ घृणा फैलाउन आएका थिए—उनी यहाँ बस्न पाउँदैनन्।” उनले थपे, “भिसामा अस्ट्रेलिया आउने जो कोही यहाँ अतिथि हुन्।”

गत महिनामात्रै बर्कले दक्षिण अफ्रिकी नागरिक म्याथ्यु ग्रुटरको भिसा पनि रद्द गरेका थिए, जब उनी न्यू साउथ वेल्स संसद भवन अगाडि भएको नियो–नाजी प्रदर्शनमा सहभागी भएको देखिएका थिए।

प्रहरीले अक्टोबरदेखि उक्त ब्रिटिश नागरिकको गतिविधि अनुसन्धान गर्दै आएको थियो। सामाजिक सञ्जाल X ले उनको खाता बन्द गरेपछि उनले नयाँ खाता बनाएर आपत्तिजनक सामग्री पोस्ट गर्न जारी राखेको आरोप छ।

नोभेम्बरमा क्याबुल्चरस्थित उनको घरमा गरिएको छापामा मोबाइल फोन, हतियार, तरबार र स्वस्तिकासहितका सामग्री बरामद गरिएको थियो। उनलाई प्रतिबन्धित नाजी प्रतीक प्रदर्शन गरेको तीनवटा मुद्दा र इन्टरनेट प्रयोग गरी अपमानजनक सामग्री प्रसारण गरेको एक मुद्दा लगाइएको छ।

अस्ट्रेलियाले यस वर्ष घृणा अपराधसम्बन्धी कानुन कडाइ गर्दै नाजी प्रतीक प्रदर्शन वा नाजी सलाम गर्नेहरूलाई अनिवार्य जेल सजायको व्यवस्था गरेको छ। प्रहरी अधिकारी स्टिफन नटले भने, “हामी सामाजिक एकता भंग गर्ने प्रतीक प्रयोगलाई रोक्न दृढ छौं। यस्तो गतिविधि देखिएमा तुरुन्तै कारबाही गरिनेछ।”