पेन्सिलभेनियाको नर्सिङ होममा आगलागी र विस्फोट : दुईको मृत्यु, अन्य केही बेपत्ता

न्युयोर्क – फिलाडेल्फियाको बाहिरी क्षेत्रमा रहेको ब्रिस्टल, पेन्सिलभेनियाको एक नर्सिङ होममा मंगलबार दिउँसो भएको आगलागी र विस्फोटमा कम्तीमा दुई जनाको मृत्यु भएको छ भने अन्य केही बेपत्ता छन्। गभर्नर जोश शापिरोले घटनास्थलमा उद्धारकर्मी, स्थानीय बासिन्दा र कर्मचारीहरूले वृद्ध बासिन्दालाई सुरक्षित स्थानमा लैजान ठूलो प्रयास गरेको जानकारी दिए।

फायर प्रमुख केभिन डिप्पोलिटोका अनुसार पाँच जना बेपत्ता हुन सक्ने अनुमान गरिएको छ, तर यो प्रारम्भिक तथ्याङ्क मात्र हो। घाइतेहरूको संख्या अझै स्पष्ट छैन, किनकि उनीहरूलाई विभिन्न अस्पतालमा लगिएको छ।

प्रारम्भिक अनुसन्धानले विस्फोटको कारण ग्यास चुहावट हुन सक्ने देखाएको छ। स्थानीय युटिलिटी कम्पनी PECO का टोलीहरू दिउँसो २ बजेपछि ग्यासको गन्धबारे सूचना पाएर पुगेका थिए। उनीहरू घटनास्थलमै रहँदा विस्फोट भएको थियो।

उद्धारकर्मीहरूले ग्यासको तीव्र गन्धबीच भवनभित्र रहेका मानिसलाई बाहिर निकाल्ने प्रयास गरे। उनीहरू बाहिर निस्किएको केही क्षणमै अर्को विस्फोट र आगलागी भयो। विस्फोटले भवनको पहिलो तल्ला भत्किएर बेसमेन्टमा खसेको छ।

शापिरोले विस्फोटलाई “वास्तवमै विनाशकारी” भने। उनले उद्धारकर्मीहरूको साहसिक प्रयासको प्रशंसा गर्दै भने, “यस घटनामा वास्तविक वीरता देखियो।”

प्रहरी र उद्धारकर्मीहरूले झ्याल, सिँढी र लिफ्टको मार्ग प्रयोग गरेर मानिसहरूलाई बाहिर निकाले। एक प्रहरी अधिकारीले दुई जनालाई काँधमा बोकेर सुरक्षित स्थानमा पुर्याएको विवरण दिइएको छ।

ब्रिस्टल हेल्थ एण्ड रिह्याब सेन्टर (पहिले सिल्भर लेक नर्सिङ होम) भर्खरै नयाँ स्वामित्वमा गएको थियो। डिसेम्बर १० मा स्वास्थ्य विभागले निरीक्षण गरी मापदण्ड सुधार गर्ने योजना बनाएको थियो। तर अघिल्लो निरीक्षणमा आगो नियन्त्रण उपकरणको कमी, सिँढीमा पहुँच नहुनु र धुवाँ रोक्ने विभाजन नभएको जस्ता कमजोरीहरू भेटिएका थिए।

विस्फोटपछि विस्थापितलाई अस्थायी रूपमा ह्यारी एस. ट्रुम्यान हाई स्कूलमा राखिएको छ। अधिकारीहरूले घटनाको कारणबारे थप अनुसन्धान जारी राखेका छन्।