जेलेंस्कीले गरे आइतबार ट्रम्पसँग भेट हुने घोषणा
न्युयोर्क- युक्रेनका राष्ट्रपति भोलोडिमिर जेलेंस्कीले आइतबार फ्लोरिडामा राष्ट्रपति डोनाल्ड ट्रम्पसँग भेट हुने बताएका छन्। उनले सामाजिक सञ्जाल X र पत्रकारहरूसँगको संवादमा उच्चस्तरीय बैठक तय भएको पुष्टि गरे।
यो सम्भावित भेटलाई रूस–युक्रेन युद्ध अन्त्य गर्न अमेरिकी नेतृत्वमा भइरहेको वार्तामा प्रगतिका संकेतका रूपमा हेरिएको छ। यद्यपि, अमेरिकी अधिकारीहरूले भेटको पुष्टि गरेका छैनन्।
जेलेंस्कीले यसअघि अमेरिकी दूत स्टिभ विटकोफ र जारेड कुश्नरसँग “सकारात्मक संवाद” भएको बताएका थिए। उनले केही क्षेत्रमा सेना फिर्ता गर्न तयार रहेको संकेत दिएका छन्, तर रूसले कब्जा गरेको भूभाग छोड्ने कुनै संकेत दिएको छैन।
रूसकी प्रवक्ता मारिया जाखारोभाले वार्ता “मन्द तर स्थिर” रूपमा अघि बढिरहेको बताइन्। तर राष्ट्रपति भ्लादिमिर पुटिनले डोनबास क्षेत्र सम्पूर्ण कब्जा गर्ने चाहना दोहोर्याएका छन्।
यसबीच, युक्रेनले ब्रिटिश Storm Shadow मिसाइल प्रयोग गरी रोस्तोभ क्षेत्रको नोभोशाख्तिन्स्क तेल शुद्धिकरण केन्द्रमा आक्रमण गरेको दाबी गरेको छ। अर्कोतर्फ, रूसी ड्रोन आक्रमणले ओडेसा र मिकोलाइभका बन्दरगाहमा विदेशी जहाजहरूलाई क्षति पुर्याएको छ।
