न्यूयोर्क, न्युजर्सी र अपस्टेट क्षेत्रमा खतरनाक हिमपात : सयौँ उडान रद्द

न्यूयोर्क- क्रिसमसपछि अमेरिकाको उत्तर–पूर्वी क्षेत्रमा आएको शक्तिशाली हिमपातले सडक यात्रा अत्यन्तै जोखिमपूर्ण बनाएको छ। न्यूयोर्क सिटीसहित न्युजर्सी, पेनसिल्भेनिया, कनेक्टिकट, म्यासाचुसेट्स र रोड आइल्याण्डमा हिउँ र बरफ जम्ने चेतावनी जारी गरिएको छ।

शुक्रबार मात्र १,५०० भन्दा बढी उडान रद्द भएका छन् भने शनिबार पनि ५०० भन्दा बढी उडान प्रभावित भएका छन्। न्यूयोर्कका तीन प्रमुख विमानस्थल (JFK, Newark Liberty, LaGuardia) र फिलाडेल्फिया अन्तर्राष्ट्रिय विमानस्थल सबैभन्दा बढी प्रभावित भएका छन्।

न्यूयोर्क सिटीमा शुक्रबार बेलुकीदेखि शनिबार बिहानसम्म ८ इन्चसम्म हिउँ पर्न सक्ने अनुमान गरिएको थियो। तर National Weather Serviceले पछिल्लो पूर्वानुमानमा हिउँको मात्रा केही कम हुने बताएको छ। शहरमा २ देखि ५ इन्चसम्म हिउँ पर्न सक्ने र उत्तरतर्फका क्षेत्रमा ६ इन्चसम्म पुग्ने सम्भावना छ। साथै, बरफ जम्ने वर्षा (freezing rain)का कारण सडकमा “glaze of ice” बन्ने चेतावनी दिइएको छ।

न्यूयोर्क राज्यकी गभर्नर क्याथी होचुलले अनावश्यक यात्रा नगर्न आग्रह गर्दै आवश्यक परेमा सावधानीपूर्वक यात्रा गर्न निर्देशन दिएकी छिन्। न्यूयोर्क सिटीका मेयर एरिक एडम्सले यसलाई “महत्वपूर्ण हिउँ घटना” भन्दै सडक सफा गर्न snow ploughs तयारी अवस्थामा रहेको बताएका छन्।

अपस्टेट न्यूयोर्कदेखि लङ्ग आइल्याण्डसम्म ६ देखि १० इन्चसम्म हिउँ पर्न सक्ने अनुमान गरिएको छ। फिलाडेल्फियामा १–३ इन्च हिउँसँगै बरफ जम्ने सम्भावना छ, जसले यात्रा कठिन बनाउन सक्छ।

पश्चिमी पेनसिल्भेनियामा बरफीला वर्षाका कारण सडकमा खतरनाक बरफ जमेको छ। त्यहाँ ice storm warning जारी गरिएको छ, जसले विद्युत् आपूर्ति अवरुद्ध हुने र रूख ढल्ने सम्भावना बढाएको छ।

यसरी, वर्षको अन्त्यतिर आएको यो हिमपातले लाखौँ मानिसको यात्रा योजनामा अवरोध पुर्याएको छ र उत्तर–पूर्वी अमेरिकामा दैनिक जीवनलाई प्रभावित बनाएको छ।