अमेरिकी नागरिकहरू पासपोर्ट बोकेर हिँड्न बाध्य : आप्रवासन छापामार कारबाहीले फैलाएको त्रास

न्युयोर्क – संयुक्त राज्य अमेरिकाभर आप्रवासन निकाय ICEको छापामार कारबाहीले त्रास फैलिँदा धेरै अमेरिकी नागरिकहरू आफ्नो पासपोर्ट दैनिक जीवनमा साथमा बोकेर हिँड्न थालेका छन्। नागरिक भए पनि गलत पहिचानका कारण नियन्त्रणमा लिइने घटनाहरू बढेपछि उनीहरू सुरक्षित रहन पासपोर्टलाई ‘सुरक्षा कवच’का रूपमा प्रयोग गर्न थालेका हुन्।

मिनियापोलिसकी मुनीरा मालिमिसाक, जो दुई दशकदेखि अमेरिकी नागरिक हुन्, सोमाली समुदायलाई लक्षित कारबाही बढेपछि डिसेम्बर २ देखि पासपोर्ट बोकेर हिँड्न थालेकी हुन्। उनले चलाएको Inspire Change Clinicमा आउने बिरामीहरूले समेत चालक अनुमतिपत्रभन्दा बढी पासपोर्ट देखाउन थालेका छन्। उनले भनिन्, “कसैलाई देखेर आप्रवासी ठानिन्छ, त्यसैले पासपोर्ट नै मेरो सुरक्षा जाल हो।”

लुइजियानाको केनरमा बस्ने वाल्टर क्रुज पेरेजले २०२२ मा नागरिकता पाएपछि सामान्यतया चालक अनुमतिपत्र मात्र बोकेर हिँड्ने गर्थे। तर हालै लातिनो समुदायलाई लक्षित कारबाही बढेपछि उनले आफ्नो पासपोर्ट मोबाइलको कभरमै राख्ने बानी बसालेका छन्। उनले भने, “समाचारमा देखिन्छ, नागरिकलाई पनि पासपोर्ट नभएको कारण नियन्त्रणमा लिइन्छ। त्यसैले समस्या टार्न पासपोर्ट साथमा राख्नैपर्छ।”

न्यु अर्लिन्स बाहिर बस्ने कारोला लोपेज, जो प्युर्टो रिकोमा जन्मिएकी अमेरिकी नागरिक हुन्, २०१५ मा टेक्सासमा अनावश्यक रूपमा रोकिनु परेको अनुभवपछि सधैं कारमा पासपोर्ट राख्ने गरेकी छन्। उनले भनिन्, “नागरिक भएर पनि पासपोर्ट देखाउनुपर्ने अवस्था दुःखद छ।”

लस एन्जलसका मिगेल रियोसले परिवारसहित पासपोर्टको प्रतिलिपि बोकेर हिँड्न थालेका छन्। उनले योजनाबद्ध यात्राहरू रद्द गरेका छन् र आफ्ना अभिभावकलाई ठूलो जमघटमा नजान आग्रह गरेका छन्। उनले भने, “यो वृद्धहरूका लागि अझ डरावना छ। परिवार टुक्राइन्छ, तर अपराधी होइन, काम गर्ने ठाउँमै छापामार हुन्छ।”

दक्षिण क्यालिफोर्नियाकी आनाले नागरिक एन्ड्रिया भेलेजलाई सडकमा नियन्त्रणमा लिएको घटना देखेपछि आफू पनि पासपोर्ट बोकेर हिँड्न थालेकी हुन्। उनले भनिन्, “म नागरिक हुँ, तर पनि पासपोर्ट बोकेर हिँड्नुपर्छ भन्ने महसुस हुन्छ। यो मानव अधिकार र न्यायिक प्रक्रियामाथि खतरनाक क्षण हो।”

यसरी, विभिन्न राज्यका नागरिकहरूले आफ्नो पहिचान प्रमाणित गर्न पासपोर्ट बोकेर हिँड्नुपर्ने बाध्यता अमेरिकी समाजमा आप्रवासन कारबाहीले सिर्जना गरेको भय र असुरक्षाको प्रत्यक्ष उदाहरण बनेको छ।