अमेरिकामा आप्रवासी हिरासतको संख्या ऐतिहासिक उच्च : ६८ हजारभन्दा बढी नियन्त्रणमा

न्युयोर्क- अमेरिकाको इमिग्रेशन एन्ड कस्टम्स इन्फोर्समेन्ट (ICE)ले २०२५ डिसेम्बर १४ सम्म ६८,४०० भन्दा बढी व्यक्तिलाई हिरासतमा राखेको तथ्यांक सार्वजनिक गरेको छ। यो संख्या यसअघि डिसेम्बरको सुरुवातमा बनेको रेकर्डलाई तोड्दै अमेरिकी इतिहासमै सबैभन्दा उच्च भएको बताइएको छ।

द गार्डियनले प्रकाशित तथ्यांकअनुसार २०२५ जनवरीदेखि हालसम्म प्रशासनले ३२८,००० भन्दा बढीलाई पक्राउ गरेको छ भने करिब ३२७,००० जनालाई निर्वासन गरिएको छ।

तर प्रशासनले “सबैभन्दा खराब आप्रवासीलाई लक्षित गर्ने” दाबी गरे पनि हिरासतमा रहेका मध्ये ठूलो हिस्सा कुनै आपराधिक अभिलेख नभएका आप्रवासीहरू नै रहेको तथ्यांकले देखाएको छ। अमेरिकामा अवैध बसोबासलाई आपराधिक होइन, नागरिक कानुनी उल्लङ्घन मानिन्छ।

यसैबीच, ट्रम्प प्रशासनले कानुनी रूपमा बसोबास गरिरहेका धेरै आप्रवासीलाई दिइएका संरक्षण अधिकारहरूलाई अमान्य गर्ने कदम चालेको छ। यसले आप्रवासी समुदायमा थप त्रास र अनिश्चितता बढाएको छ।

यो तथ्यांकले अमेरिकी आप्रवासन नीतिको कठोरता र यसको सामाजिक प्रभावबारे गम्भीर बहसलाई पुनः जीवित बनाएको छ।