न्यूयोर्कमा सामाजिक सञ्जालमा मानसिक स्वास्थ्य चेतावनी अनिवार्य
न्यूयोर्क- न्यूयोर्क राज्यले सामाजिक सञ्जाल प्रयोगकर्ताहरू, विशेषतः किशोर–किशोरीलाई लक्षित गर्दै नयाँ कानुन लागू गरेको छ। गभर्नर क्याथी होचुलले हस्ताक्षर गरेको यो कानुनअनुसार इनफिनिट स्क्रोलिङ, अटो–प्ले र एल्गोरिद्मिक फिड जस्ता सुविधाहरू भएका सामाजिक सञ्जाल प्लेटफर्महरूले अब मानसिक स्वास्थ्यमा पर्ने सम्भावित असरबारे चेतावनी देखाउनुपर्नेछ।
गभर्नर होचुलले यसलाई धूमपान वा प्लास्टिक प्याकेजिङमा हुने चेतावनीसँग तुलना गर्दै भनिन्, “हाम्रो प्राथमिकता न्यूयोर्कवासीलाई सुरक्षित राख्नु हो, र यसमा सामाजिक सञ्जालका लत लाग्ने सुविधाबाट बालबालिकालाई जोगाउनु पनि पर्छ।”
कानुनमा उल्लेख गरिएको अनुसन्धानअनुसार सामाजिक सञ्जालको अत्यधिक प्रयोगले मस्तिष्कको reward center लाई उत्तेजित गर्छ, जसको प्रभाव लागूपदार्थ वा जुवाको लतसँग मिल्दोजुल्दो हुन्छ।
यो कानुन उल्लङ्घन गर्ने प्लेटफर्ममाथि राज्यको अटर्नी जनरलले कानुनी कारबाही गर्न सक्नेछ र प्रत्येक उल्लङ्घनमा अधिकतम ५,००० डलरसम्मको जरिवाना तोक्न सक्नेछ।
न्यूयोर्कको यो कदमसँगै क्यालिफोर्निया र मिनेसोटा जस्ता अन्य अमेरिकी राज्यहरूले पनि सामाजिक सञ्जाल प्रयोगमा बालबालिकाको मानसिक स्वास्थ्यलाई ध्यानमा राख्दै समान कानुन लागू गरिसकेका छन्।
यसैबीच, अष्ट्रेलियाले हालै १६ वर्षमुनिका बालबालिकालाई फेसबुक, इन्स्टाग्राम, युट्युब, टिकटक, स्न्यापच्याट र रेडिट जस्ता प्लेटफर्म प्रयोग गर्नै नपाउने गरी प्रतिबन्ध लगाएको छ। मलेसिया र डेन्मार्कले पनि यस्तै कदम चाल्ने संकेत दिएका छन् भने बेलायत, जर्मनी र फ्रान्सले सामाजिक सञ्जाल प्रयोगमा थप कडाइ गरेका छन्।
सामाजिक सञ्जालको मानसिक स्वास्थ्यमा पर्ने असर विश्वव्यापी चिन्ताको विषय बनेको छ, र अमेरिकाका केही विद्यालयहरूले सामाजिक सञ्जाल कम्पनीविरुद्ध मुद्दा दायर गर्न थालेका छन्।
यसरी, न्यूयोर्कको नयाँ कानुनले सामाजिक सञ्जाल प्रयोगमा चेतावनी अनिवार्य गर्दै बालबालिकाको मानसिक स्वास्थ्यलाई प्राथमिकतामा राखेको छ।
