जोहरान ममदानीले सम्हाले न्यूयोर्कको कमान्ड: ऐतिहासिक सब-वे स्टेशनमा लिए शपथ
न्यूयोर्क – जोहरान ममदानीले बिहीबार मध्यरातमा न्यूयोर्क शहरको नयाँ मेयरका रूपमा पदभार सम्हालेका छन्। उनले म्यानहटनको एक ऐतिहासिक तथा पुरानो सब-वे स्टेशनमा आयोजित विशेष समारोहमा पद तथा गोपनीयताको शपथ लिए।
३४ वर्षका ममदानी न्यूयोर्कको इतिहासमै पहिलो मुस्लिम मेयर बनेका छन्। यसका साथै उनी दक्षिण एसियाली मूलको र अफ्रिकामा जन्मिएको पहिलो मेयर समेत हुन्। शपथ ग्रहणका क्रममा उनले कुरानमा हात राखेर प्रतिज्ञा गरेका थिए।
शपथ लिएपछि उनले छोटो मन्तव्य दिँदै पुरानो सब-वे स्टेशनलाई शहरको स्वास्थ्य र विरासतको प्रतीकका रूपमा व्याख्या गरे। उनले सोही अवसरमा माइक फ्लिनलाई नयाँ यातायात कमिश्नर नियुक्त गरेको घोषणा समेत गरे।
ममदानीले फेरि दिउँसो १ बजे सिटी हलमा भव्य सार्वजनिक समारोहका बीच शपथ लिने कार्यक्रम छ। उनलाई उनकै राजनीतिक आदर्श मानिने अमेरिकी सिनेटर बर्नी स्यान्डर्सले शपथ खुवाउने छन्। त्यसपछि ब्रोडवेमा ‘क्यान्यन अफ हिरोज’ नामको सार्वजनिक उत्सव मनाइने बताइएको छ।
मेयरका रूपमा ममदानीका अगाडि धेरै चुनौती छन्। उनले आफ्नो चुनावी अभियानमा निःशुल्क शिशु स्याहार, निःशुल्क बस सेवा र झन्डै १० लाख घरपरिवारको भाडा वृद्धि रोक्ने जस्ता महत्त्वाकांक्षी बाचा गरेका थिए। यद्यपि, उनले शहरको फोहोर व्यवस्थापन, सडकका खाल्डाखुल्डी र मुसा नियन्त्रण जस्ता दैनिक समस्याहरू पनि सुल्झाउनु पर्नेछ।
युगाण्डामा जन्मिएका ममदानी सन् २०१८ मा मात्र अमेरिकी नागरिक बनेका थिए। उनले यसअघि क्विन्स क्षेत्रबाट स्टेट एसेम्बलीको चुनाव जितेका थिए। रोचक कुरा के छ भने, सुरुमा विरोध गरे पनि अमेरिकी राष्ट्रपति डोनाल्ड ट्रम्पले ओभल अफिसमा ममदानीसँग भेट गर्दै उनलाई सहयोग गर्ने बाचा गरेका छन्। यद्यपि, आप्रवासन जस्ता विषयमा ट्रम्प र ममदानीबीच मतभेद हुन सक्ने अनुमान गरिएको छ।
