एरिजोनामा निजी हेलिकप्टर दुर्घटना: पाइलट र एकै परिवारका तीन महिलासहित चारको मृत्यु
एरिजोना- अमेरिकाको एरिजोना राज्यको पहाडी क्षेत्रमा शुक्रबार एउटा निजी हेलिकप्टर दुर्घटना हुँदा चार जनाको ज्यान गएको छ। राज्यको राजधानी फिनिक्स नजिकैको सुपीरियर सहरको पहाडी भेगमा यो दुखद दुर्घटना भएको हो।
पिनल काउन्टी शेरिफको कार्यालयका अनुसार, हेलिकप्टर शुक्रबार बिहान करिब ११ बजे दुर्घटनामा परेको थियो। दुर्घटनाको खबर पाउनासाथ उद्धारकर्मीहरू घटनास्थलमा पुगेका थिए, तर हेलिकप्टरको भग्नावशेषमा रहेका सबै चार जनाको मृत्यु भइसकेको पुष्टि भयो।
मृत्यु हुनेहरूमा हेलिकप्टरका पाइलट र एकै परिवारका तीन जना महिला सदस्यहरू रहेको अधिकारीहरूले जनाएका छन्। शेरिफको कार्यालयले सामाजिक सञ्जाल फेसबुकमार्फत यस घटनाको जानकारी दिँदै पीडित परिवारप्रति समवेदना व्यक्त गरेको छ।
अहिले संघीय उड्डयन प्रशासन र राष्ट्रिय यातायात सुरक्षा बोर्डले दुर्घटनाको कारणबारे अनुसन्धान सुरु गरेका छन्। खराब मौसम वा प्राविधिक गडबडी के कारणले दुर्घटना भयो भन्ने कुरा विस्तृत अनुसन्धानपछि मात्र खुल्ने अधिकारीहरूले बताएका छन्।
