ट्रम्प र सर्वोच्च अदालतबीचको सम्बन्धमा दरार आउने सङ्केत: २०२६ मा महत्त्वपूर्ण फैसलाहरू हुँदै
वासिङ्टन – अमेरिकी राष्ट्रपति डोनाल्ड ट्रम्प र सर्वोच्च अदालतबीचको हालसम्मको सुमधुर सम्बन्ध नयाँ वर्ष २०२६ सँगै केही जटिल बन्न सक्ने देखिएको छ। सन् २०२५ मा अदालतको ६-३ को कन्जरभेटिभ (रुढिवादी) बहुमतले ट्रम्पका धेरै विवादास्पद निर्णयहरूमा उनलाई साथ दिए पनि, अब भने केही गम्भीर मुद्दाहरूमा अदालतले निर्णायक फैसला सुनाउने तयारी गरेको छ।
अदालतले जन्मसिद्ध नागरिकता (Birthright Citizenship) खारेज गर्ने ट्रम्पको योजना, उनले लगाएको व्यापक भन्सार शुल्क (Tariffs), र फेडरल रिजर्भको बोर्ड सदस्यलाई बर्खास्त गर्ने प्रयास जस्ता संवेदनशील मुद्दाहरूको फैसला यसै वर्षका लागि सारेको थियो। इतिहासलाई हेर्दा, सर्वोच्च अदालतले अक्सर राष्ट्रपतिको शक्ति र लोकप्रियता केही घटेको समयमा मात्र ठुला र प्रतिकूल फैसलाहरू सुनाउने गरेको छ।
न्यूयोर्क युनिभर्सिटीका कानुनका प्राध्यापक रिचर्ड पिल्डेसका अनुसार, अदालतले राष्ट्रपतिसँग सिधै भिड्नुको साटो उपयुक्त समयको पर्खाइ गरिरहेको हुन सक्छ। सन् २०२५ को सुरुमा ट्रम्पको लोकप्रियता बढी भए पनि डिसेम्बरसम्म आइपुग्दा उनको कामप्रति ५८ प्रतिशतले असन्तुष्टि जनाएको सर्वेक्षणले देखाएको छ।
ऐतिहासिक रूपमा पनि सन् १९५२ मा राष्ट्रपति ह्यारी ट्रुम्यान र १९७४ मा रिचर्ड निक्सनले आफ्ना कार्यकालका उत्तरार्धमा सर्वोच्च अदालतबाट ठुला कानुनी झट्काहरू पाएका थिए। निक्सनको हकमा त अदालतको फैसलाले उनलाई राजीनामा दिनै बाध्य पारेको थियो। पछिल्लो समय जर्ज डब्लु बुस, बाराक ओबामा र जो बाइडनले पनि कार्यकालको अन्त्यतिर अदालतबाट आफ्ना मुख्य एजेन्डाहरूमा हार व्यहोर्नुपरेको थियो।
विज्ञहरूका अनुसार, अदालतले जानीजानी कतिपय मुद्दाहरूलाई लम्ब्याएर सन् २०२६ को मध्यतिर (मिडटर्म चुनावको मुखमा) पुर्याएको छ। उदाहरणका लागि, जन्मसिद्ध नागरिकताको मुद्दामा धेरैजसो कानुनी विज्ञहरूले अदालतले ट्रम्पको विपक्षमा फैसला सुनाउने अनुमान गरेका छन्। त्यस्तै, भन्सार शुल्कका बारेमा भएको बहसका क्रममा पनि न्यायाधीशहरू ट्रम्पको शक्तिप्रति सशङ्कित देखिएका थिए।
अदालतले यसरी निर्णयहरू ढिलो गर्दा उसको आफ्नै वैधता र निष्पक्षता जोगाउन मद्दत पुग्ने कतिपयको बुझाइ छ। अबको केही महिनामा आउने यी फैसलाहरूले ट्रम्पको दोस्रो कार्यकालको बाँकी समय र अमेरिकी राजनीतिको दिशा तय गर्ने निश्चित छ।
