अध्यागमन एजेन्टलाई कोठा नदिएकोमा हिल्टन र मिनिसोटाको होटलद्वारा माफी
न्युयोर्क- अमेरिकाको मिनिसोटास्थित एउटा होटलले संघीय अध्यागमन एजेन्टहरूलाई बास बस्न अस्वीकार गरेपछि उत्पन्न विवादमा हिल्टन होटल समूह र स्थानीय सञ्चालकले माफी मागेका छन्। अध्यागमन प्रवर्तनमा खटिएका कर्मचारीहरूलाई सेवा दिन इन्कार गर्नु आफ्नो नीतिको विरुद्ध भएको भन्दै होटलले क्षमायाचना गरेको हो। यसअघि अमेरिकी गृह सुरक्षा मन्त्रालय (DHS) ले हिल्टन होटलले आफ्ना कर्मचारीहरूलाई सेवा नदिन योजनाबद्ध रूपमा अवरोध पुर्याएको आरोप लगाएको थियो।
मिनियापोलिसबाट करिब २० माइल दक्षिणमा रहेको ‘ह्याम्पटन इन लेकभिल’ होटलले एजेन्टहरूलाई बास बस्न अनुमति नदिइने र उनीहरूको बुकिङ रद्द गरिएको इमेल पठाएको थियो। सरकारी इमेल र दर प्रयोग गरेर कोठा बुक गर्न खोज्दा होटलले द्वेषपूर्ण रूपमा बुकिङ रद्द गरिदिएको भन्दै गृह मन्त्रालयले सामाजिक सञ्जालमा यसको कडा आलोचना गरेको थियो। यो कदमलाई अध्यागमन कानुन कार्यान्वयनमा जानाजानी बाधा पुर्याएको रूपमा हेरिएको थियो।
हिल्टन ब्रान्ड अन्तर्गत रहे पनि उक्त होटल स्वतन्त्र रूपमा ‘एभरपिक हस्पिटालिटी’ ले सञ्चालन गर्दै आएको छ। सञ्चालक कम्पनीले एक विज्ञप्ति जारी गर्दै बुकिङ रद्द गर्ने निर्णय कम्पनीको समावेशी नीतिको विपरीत भएको र यसमा संलग्न टोलीलाई सचेत गराइएको जानकारी दिएको छ। उनीहरूले आफूहरूले कुनै पनि व्यक्ति वा निकायप्रति भेदभाव नगर्ने स्पष्ट पार्दै प्रभावित पाहुनाहरूलाई उचित बासको व्यवस्था मिलाउन सम्पर्क गरिरहेको बताएका छन्।
