फ्लोरिडामा तेस्रो अध्यागमन थुना केन्द्र खोल्ने तयारी: संघीय अनुमति पर्खिँदै गभर्नर डिसेन्टिस
फ्लोरिडा- अमेरिकी राज्य फ्लोरिडाका गभर्नर रन डिसेन्टिसले अवैध अध्यागमनलाई लक्षित गर्दै राज्यमा तेस्रो थुना केन्द्र (डिटेन्सन सेन्टर) सञ्चालनका लागि संघीय सरकारको अनुमतिको पर्खाइमा रहेको बताएका छन्। ‘एलिगेटर अल्काट्राज’ र ‘डिपोर्टेसन डिपो’ पछि अब राज्यको प्यानह्यान्डल क्षेत्रमा नयाँ केन्द्र खोल्ने तयारी गरिएको हो। सोमबार उत्तर-पूर्वी फ्लोरिडामा आयोजित एक पत्रकार सम्मेलनमा बोल्दै गभर्नर डिसेन्टिसले अमेरिकी गृह सुरक्षा मन्त्रालयले स्वीकृति दिने बित्तिकै यसलाई सञ्चालनमा ल्याइने जानकारी दिए। उनले हालको थुना क्षमता पर्याप्त नभएकाले संघीय सरकारले यसलाई छिट्टै अनुमोदन गर्ने विश्वास समेत व्यक्त गरेका छन्।
गभर्नरका अनुसार तेस्रो केन्द्रका अतिरिक्त दक्षिण फ्लोरिडामा चौथो थुना केन्द्र खोल्ने सम्भावित विकल्पमा पनि छलफल भइरहेको छ। फ्लोरिडा सरकारले यसअघि नै एभरग्लेड्सको दुर्गम क्षेत्रमा एउटा थुना केन्द्र निर्माण गरिसकेको छ। प्यानह्यान्डलमा प्रस्तावित नयाँ केन्द्रको ठ्याक्कै स्थान भने संघीय स्वीकृति प्राप्त भएपछि मात्र सार्वजनिक गरिने गभर्नरको सचिवालयले जनाएको छ। अध्यागमन नियन्त्रणका लागि फ्लोरिडाले चालेका यी कडा कदमहरूले राज्य र संघीय सरकारबीचको सहकार्य र चुनौतीलाई पुनः चर्चामा ल्याएको छ।
