प्रेस सचिव क्यारोलिन लेभिटको पारिवारिक नाता पर्ने महिलालाई रिहा गर्न अदालतको आदेश

वासिङटन- ह्वाइट हाउसकी प्रेस सचिव क्यारोलिन लेभिटसँग पारिवारिक सम्बन्ध भएकी एक ब्राजिलियन महिलालाई अमेरिकी अध्यागमन अदालतले धरौटीमा रिहा गर्न आदेश दिएको छ। ३३ वर्षीया ब्रुना फरेरालाई गत नोभेम्बर १२ मा म्यासाचुसेट्सबाट अध्यागमन एजेन्टहरूले पक्राउ गरेका थिए। उनी लेभिटका भाइ माइकलकी पूर्व प्रेमिका हुन् र उनीहरूको ११ वर्षको छोरा समेत छ। लुजियानाको एक थुना केन्द्रमा राखिएकी फरेरालाई न्यायाधीशले १५ सय डलर धरौटीमा रिहा गर्ने निर्णय सुनाएका हुन्।

फरेराका वकिल टोड पोमरलोका अनुसार उनी समाजका लागि खतरनाक नभएको र भाग्ने सम्भावना पनि नरहेको तर्क अदालतमा पेश गरिएको थियो, जसमा सरकारी पक्षले समेत कुनै विरोध गरेन। यद्यपि, गृह सुरक्षा मन्त्रालयका प्रवक्ताले उनलाई ‘आपराधिक गैरकानुनी आप्रवासी’ भन्दै कुटपिटको अभियोगमा पक्राउ गरिएको दाबी गरेका छन्, जसलाई उनका वकिलले पूर्ण रूपमा अस्वीकार गरेका छन्। रिहा भए पनि उनले समय-समयमा अध्यागमन कार्यालयमा हाजिर हुनुपर्ने र निष्कासन विरुद्धको कानुनी लडाइँ जारी राख्नुपर्नेछ।

बाल्यकालमै अमेरिका आएकी फरेराले ओबामाकालीन ‘डाका’ (DACA) कार्यक्रम अन्तर्गत संरक्षण पाएकी थिइन् र हाल उनी स्थायी बसोबास (ग्रीन कार्ड) का लागि आवेदन दिने प्रक्रियामा थिइन्। यस घटनाले ह्वाइट हाउसकी मुख्य प्रवक्ताको परिवारसँग जोडिएका व्यक्तिकै आप्रवासी स्थितिलाई लिएर चर्चा पैदा गरेको छ। प्रेस सचिव क्यारोलिन लेभिटले भने यस विषयमा अहिलेसम्म कुनै सार्वजनिक टिप्पणी गरेकी छैनन्।