इरानमा आर्थिक संकटविरुद्धको आन्दोलन चर्कियो: कम्तीमा ३६ जनाको मृत्यु, २ हजारभन्दा बढी पक्राउ

इरान- इरानमा विगत १० दिनदेखि जारी आर्थिक संकट र अत्यधिक महँगीविरुद्धको आन्दोलनले उग्र रूप लिएको छ। मानव अधिकार कार्यकर्ता समाचार एजेन्सी (HRANA) का अनुसार प्रदर्शनका क्रममा हालसम्म कम्तीमा ३६ जनाको ज्यान गइसकेको छ, जसमा ३४ जना प्रदर्शनकारी र २ जना सुरक्षाकर्मी रहेका छन्। इरानी मुद्रा रियालको मूल्य अमेरिकी डलरको तुलनामा ऐतिहासिक रूपमा घटेपछि र खाद्यान्न तथा औषधिको मूल्य अकासिएपछि डिसेम्बरको अन्त्यबाट सुरु भएको यो विरोध प्रदर्शन अहिले देशका ३१ मध्ये २७ प्रान्तहरूमा फैलिसकेको छ।

सुरक्षा बलले प्रदर्शनकारीहरूलाई तितरबितर पार्न अश्रुग्यास र कतिपय ठाउँमा गोली समेत चलाएको रिपोर्टहरू सार्वजनिक भएका छन्। हिंसाका क्रममा ६० भन्दा बढी प्रदर्शनकारी घाइते भएका छन् भने २ हजार ७६ जनालाई हिरासतमा लिइएको छ। इरानी अधिकारीहरूले आधिकारिक रूपमा मृत्यु हुनेको सङ्ख्या सार्वजनिक नगरे पनि सुरक्षाकर्मीहरू मारिएको पुष्टि गरेका छन्। विशेष गरी युवा पुस्ता (जेन-जी) को ठुलो सहभागिता रहेको यस आन्दोलनले इरानको वर्तमान सरकारलाई सन् २०२२ पछिको सबैभन्दा ठुलो चुनौती दिएको विश्लेषकहरूको ठहर छ।