उत्तर एटलान्टिकमा नाटकीय ओसारपसार: अमेरिकाद्वारा रुसी झण्डावाहक तेल ट्याङ्कर नियन्त्रणमा
न्युयोर्क- भेनेजुएलाको तेल नाकाबन्दीलाई थप कडा पार्दै संयुक्त राज्य अमेरिकाले हप्तौँ लामो प्रयासपछि एक रुसी झण्डावाहक तेल ट्याङ्कर ‘मारिनेरा’ (पूर्व नाम: बेला १) लाई उत्तर एटलान्टिक महासागरबाट नियन्त्रणमा लिएको छ। अमेरिकी तटीय रक्षकको जहाज ‘मुनरो’ ले लामो समयदेखि पिछा गरिरहेको यस प्रतिबन्धित जहाजलाई बुधबार बिहान संघीय अदालतको वारेन्ट बमोजिम कब्जा गरिएको हो। यसका साथै क्यारिबियन सागरमा अवैध गतिविधि गरिरहेको अर्को ट्याङ्कर ‘एम/टी सोफिया’ लाई पनि अमेरिकाले नियन्त्रणमा लिएको घोषणा गरेको छ।
अमेरिकी रक्षा सचिव पिट हेगसेथले यस कदमको पुष्टि गर्दै भेनेजुएलाको प्रतिबन्धित तेलमाथिको नाकाबन्दी विश्वभर पूर्ण रूपमा लागू रहेको चेतावनी दिएका छन्। यो घटनाले वासिङ्टन र मस्कोबीचको सम्बन्धमा नयाँ तनाव थपेको छ। रुसले आफ्ना जहाजहरूलाई अमेरिकी र नाटो (NATO) सेनाले अनावश्यक रूपमा दुख दिएको र अन्तर्राष्ट्रिय समुद्री कानुनको उल्लङ्घन गरेको आरोप लगाएको छ। ट्रम्प प्रशासनले भेनेजुएलाको विशाल तेल भण्डारलाई आफ्नो नियन्त्रणमा लिने योजना बनाइरहेका बेला रुसले भने मादुरो शासनलाई साथ दिँदै आफ्ना ट्याङ्करहरू मार्फत सहयोग गरिरहेको थियो।
यो सैन्य अपरेशन निकै रणनीतिक देखिन्छ, किनकि पछिल्लो केही दिनमा धेरै अमेरिकी सैन्य विमानहरू स्कटल्याण्डको तटीय क्षेत्रमा उडिरहेका देखिएका थिए। रुसी प्रोपोगान्डा च्यानल ‘RT’ ले जहाजभित्रैबाट खिचिएको भिडियो सार्वजनिक गर्दै यसलाई ‘अपहरणको प्रयास’ भनेको छ। भेनेजुएलाका राष्ट्रपति निकोलस मादुरोलाई पक्राउ गरी न्युयोर्क पुर्याइएपछि अमेरिकाले अहिले भेनेजुएलाको तेल निर्यात हुने सबै मार्गहरू बन्द गर्ने रणनीति लिएको छ। ‘मारिनेरा’ जस्तै अन्य तीनवटा प्रतिबन्धित जहाजहरूले पनि हालै आफ्नो झण्डा परिवर्तन गरी रुसी झण्डा राखेको पाइएको छ, जसले गर्दा समुद्रमा अमेरिका र रुसबीचको लुकामारी अझै केही समय चर्कने देखिन्छ।
