अमेरिकाभर ‘आइस’ विरुद्ध विशाल प्रदर्शनको तयारी: रेनी गुडको मृत्युले निम्त्यायो नागरिक आक्रोश

न्युयोर्क- मिनेयापोलिस र पोर्टल्यान्डमा सङ्घीय अध्यागमन एजेन्टहरूले चलाएको गोलीकाण्डको विरोधमा शनिबार अमेरिकाका विभिन्न सहरहरूमा विशाल प्रदर्शनको तयारी गरिएको छ। विशेष गरी ३७ वर्षीया रेनी गुडको मृत्यु र पोर्टल्यान्डमा दुई व्यक्ति घाइते भएको घटनापछि नागरिकहरूमा तीव्र आक्रोश फैलिएको छ। ‘इन्डिभिजिबल’ जस्ता सामाजिक संस्थाहरूको नेतृत्वमा टेक्सास, कान्सास, ओहायो र फ्लोरिडा लगायतका राज्यहरूमा ‘आइस आउट फर गुड’ (ICE Out for Good) नाराका साथ सयौँ विरोध कार्यक्रमहरू आयोजना गरिएका छन्। मिनेयापोलिसको पाउडरहर्न पार्कमा भेला भई प्रदर्शनकारीहरूले सडकमा भइरहेको “सरकारी आतंक” बन्द गर्न र आप्रवासीहरूको सुरक्षा सुनिश्चित गर्न माग गरेका छन्।

यस घटनाले सङ्घीय र स्थानीय सरकारबीचको सम्बन्धमा समेत दरार उत्पन्न गराएको छ। ट्रम्प प्रशासनले एजेन्टहरूको कदमलाई “आत्मरक्षा” भनेर बचाउ गरिरहेको छ भने मिनेयापोलिसका मेयर र मिनेसोटाका गभर्नरले त्यसलाई “दुष्प्रचार” भन्दै कडा आपत्ति जनाएका छन्। एफबीआई (FBI) ले अनुसन्धानमा राज्यका निकायहरूलाई सहभागी नगराएकोमा स्थानीय नेताहरूले असन्तुष्टि व्यक्त गर्दै निष्पक्ष छानबिनको माग गरेका छन्। मिनेयापोलिसका केही विद्यालयहरू सुरक्षा सतर्कताका लागि बन्द गरिएका छन् भने सङ्घीय भवनहरू बाहिर सुरक्षाकर्मी र प्रदर्शनकारीबीच फाट्टफुट्ट झडपहरु समेत भएका छन्। यो आन्दोलन सन् २०२० को जर्ज फ्लोयड प्रकरणपछिको ठुलो नागरिक सक्रियताका रूपमा देखिएको छ, जसले अमेरिकाको अध्यागमन नीति र सङ्घीय प्रहरीको कार्यशैलीमाथि गम्भीर प्रश्न उठाएको छ।