मादुरोको अन्त्यपछि अमेरिकामा रहेका भेनेजुएलीहरू हर्ष र त्रासको दोसाँधमा

न्युयोर्क- अमेरिकी सैन्य कारबाहीमार्फत भेनेजुएलाका राष्ट्रपति निकोलास मादुरो पदच्युत भएसँगै अमेरिकामा बसोबास गर्ने लाखौँ भेनेजुएलीहरूमा खुसी र अनिश्चितता एकैसाथ देखिएको छ। वर्षौँदेखि दमन र आर्थिक संकट झेल्दै आएका आप्रवासीहरू मादुरोको पक्राउलाई “मुक्ति” को रूपमा हेरिरहेका छन्। फ्लोरिडाको डोराल जस्ता भेनेजुएली बाहुल्य क्षेत्रहरूमा मानिसहरू झण्डा बोकेर सडकमा उत्रिएका छन् र “स्वतन्त्र भेनेजुएला” को नारा लगाउँदै उत्सव मनाइरहेका छन्। धेरैका लागि यो आफ्ना आफन्तहरूसँग पुनर्मिलन हुने र आफ्नै मातृभूमि फर्कन पाउने एउटा आशलाग्दो किरण बनेको छ।

तर, यो खुसीसँगै एउटा गहिरो चिन्ता पनि जोडिएको छ। ट्रम्प प्रशासनले भेनेजुएलीहरूका लागि उपलब्ध ‘अस्थायी सुरक्षित स्थिति’ र अन्य कानुनी सुविधाहरू खारेज गर्ने तयारी गरेपछि त्यहाँ रहेका झन्डै ७ लाख ७० हजार आप्रवासीहरूमा देश निकाला हुने डर बढेको छ। मादुरो हटे पनि भेनेजुएलामा अझै पनि उनको शासनका अवशेषहरू बाँकी रहेको र देश अझै सुरक्षित भइनसकेको उनीहरूको बुझाइ छ। “मादुरो त पक्राउ परे, तर अपराधीहरू अझै त्यहीँ छन्,” साल्ट लेक सिटीमा बस्ने एक भेनेजुएलीले भने। आप्रवासीहरू आफूले वर्षौँ लगाएर अमेरिकामा बनाएको जीवन र असुरक्षित मातृभूमि बीचको जटिल रोजाइमा फसेका छन्।