मिनियापोलिसमा बर्बरता: गुडिरहेको कारबाट महिलालाई घिसार्दै अध्यागमन एजेन्ट
न्युयोर्क- मिनियापोलिसमा संघीय अध्यागमन एजेन्टहरूले एक महिलालाई उनकै कारबाट जबरजस्ती घिसारेर निकालेको भिडियो सार्वजनिक भएपछि सामाजिक सञ्जालमा आक्रोश फैलिएको छ। भिडियोमा हतियारधारी एजेन्टहरूले कारको झ्याल फुटाएको र चिच्याइरहेकी महिलालाई सडकमा पछारेर नियन्त्रणमा लिएको देखिन्छ। यो घटना ट्रम्प प्रशासनको ‘अपरेशन मेट्रो सर्ज’ अन्तर्गत भइरहेको कडा धरपकडको एउटा हिस्सा हो।
स्थानीय प्रत्यक्षदर्शीले खिचेको यो भिडियोले मिनेसोटामा जारी तनावलाई थप उकासेको छ। ७ जनवरीमा रेनी गुडको मृत्यु भएपछि पहिले नै आक्रोशित बनेका स्थानीयले यसलाई ‘प्रहरी आतङ्क’ को संज्ञा दिएका छन्। यद्यपि, संघीय निकायले भने ती महिलाले एजेन्टको काममा बाधा पुर्याएको वा शङ्कास्पद गतिविधिमा संलग्न भएको दाबी गरेको छ। अदालतले शान्तिपूर्ण प्रदर्शनकारीमाथि बल प्रयोग नगर्न आदेश दिएकै समयमा यस्ता दृश्यहरू बाहिरिनुले कानुनी र नैतिक प्रश्न उब्जाएको छ।
