अमेरिकामा अध्यागमन एजेन्टको बर्बरता: सेप्टेम्बरदेखि यता ११ जनामाथि गोली प्रहार

न्युयोर्क-  ट्रम्प प्रशासनले अध्यागमन धरपकडलाई तीव्र पारेसँगै संघीय एजेन्टहरूले सर्वसाधारणमाथि गोली चलाउने क्रम चिन्ताजनक रूपमा बढेको छ। गत सेप्टेम्बर महिनादेखि यता भएका विभिन्न कारबाहीका क्रममा आइस (ICE) र सीमा सुरक्षा बलका एजेन्टहरूले कम्तीमा ११ जनामाथि गोली चलाएका छन्। यी घटनाहरूमा तीन जनाको मृत्यु भएको छ भने अन्य गम्भीर घाइते भएका छन्। मारिनेहरूमा मिनेसोटाकी ३७ वर्षीया अमेरिकी नागरिक रेनी गुड र इलिनोइसका सिल्भेरियो भिल्लेगास गोन्जालेज रहेका छन्।

सुरक्षा विज्ञहरूका अनुसार एजेन्टहरूले गुडिरहेको गाडीभित्र रहेका चालकहरूलाई निसाना बनाएर गोली हान्ने खतरनाक प्रवृत्ति अपनाएका छन्। यद्यपि धेरैजसो स्थानीय प्रहरी विभागहरूले यस्तो अभ्यासलाई जोखिमपूर्ण मान्दै निषेध गरेका छन्। गृह मन्त्रालयले भने आफ्ना अधिकारीहरूले आत्मरक्षाका लागि र गाडीलाई हतियारको रूपमा प्रयोग गर्ने ‘दङ्गाकारी’ विरुद्ध बल प्रयोग गरेको दाबी गरेको छ। तर, सार्वजनिक भएका धेरै भिडियोहरूले प्रशासनको दाबीलाई चुनौती दिएका छन्। विशेष गरी मिनियापोलिसमा रेनी गुडको हत्यापछि स्थानीय जनता र संघीय एजेन्टबीच दिनहुँ झडप भइरहेका छन्, जसले सहरमा युद्धको जस्तै सन्त्रास फैलाएको छ।