ग्रिनल्यान्ड विवाद: ट्रम्पको कर धम्कीविरुद्ध युरोपेली राष्ट्रहरूको कडा प्रतिवाद

न्युयोर्क- अमेरिकी राष्ट्रपति डोनल्ड ट्रम्पले ग्रिनल्यान्डमा अमेरिकी नियन्त्रणको विरोध गर्ने आठ युरोपेली राष्ट्रहरूमाथि १० प्रतिशत कर लगाउने धम्की दिएपछि युरोप र अमेरिकाबीचको कुटनीतिक सम्बन्धमा गम्भीर संकट देखिएको छ। डेनमार्क, फ्रान्स, जर्मनी र बेलायतसहितका राष्ट्रहरूले ट्रम्पको यो कदमलाई ‘खतरनाक गिरावट’ को सङ्केत भन्दै यसले दशकौँदेखिको ट्रान्सअटलान्टिक मित्रतालाई कमजोर पार्ने चेतावनी दिएका छन्। ट्रम्पले ग्रिनल्यान्डमा डेनमार्कको सैन्य अभ्यासमा सहभागी युरोपेली सेनालाई निसानामा राख्दै यो आर्थिक दबाब सिर्जना गर्न खोजेका हुन्।

युरोपेली सङ्घ (ईयू) का नेताहरूले यसलाई ‘व्यावसायिक ब्ल्याकमेल’ को संज्ञा दिँदै आफूहरू कुनै पनि प्रकारको दबाब सामु नझुक्ने स्पष्ट पारेका छन्। ट्रम्पले सामाजिक सञ्जालमार्फत ग्रिनल्यान्डमा रुसी खतरा रहेको दाबी गर्दै कारबाहीको धम्की दिइरहँदा, युरोपेली नेताहरूले भने यस विषयलाई नाटोभित्रै छलफल गरेर सुल्झाउन सकिने बताएका छन्। यो विवादले गर्दा विश्व राजनीतिमा अमेरिका र उसका परम्परागत सहयोगीहरूबीचको दूरी बढ्ने जोखिम देखिएको छ, जसको फाइदा अन्य शक्ति राष्ट्रहरूले उठाउन सक्ने विश्लेषकहरूको ठहर छ।