प्रतिनिधिसभा निर्वाचनका लागि भारतद्वारा ६० वटा पिकअप गाडी हस्तान्तरण
काठमाडौं- आगामी फागुन २१ गते हुने प्रतिनिधिसभा सदस्य निर्वाचनको तयारीका लागि भारत सरकारले नेपाललाई पहिलो चरणको चुनावी सहयोग स्वरूप ६० वटाभन्दा बढी पिकअप गाडीहरू उपलब्ध गराएको छ। मंगलबार गृह मन्त्रालयमा आयोजित एक विशेष समारोहका बीच नेपालका लागि भारतीय दूतावासका कार्यवाहक राजदूत डा. राकेश पाण्डेले गृहमन्त्री ओमप्रकाश अर्याललाई ती सवारीसाधनको साँचो हस्तान्तरण गर्नुभयो। निर्वाचनलाई व्यवस्थित र मर्यादित रूपमा सम्पन्न गर्न लजिस्टिक सहयोग पुर्याउने उद्देश्यले भारतले यी सवारीसाधन प्रदान गरेको हो।
नेपाल सरकारको अनुरोधमा भारतले यस निर्वाचनका लागि कुल ६५० वटा सवारीसाधन उपलब्ध गराउने प्रतिबद्धता व्यक्त गरेको छ। मंगलबार हस्तान्तरण गरिएका गाडीहरू पहिलो खेप हुन् भने बाँकी सवारीसाधनहरू आगामी केही हप्ताभित्र विभिन्न चरणमा उपलब्ध गराइने भारतीय दूतावासले जनाएको छ। सहयोग ग्रहण गर्दै गृहमन्त्री अर्यालले भारत सरकार र भारतीय जनताप्रति आभार प्रकट गर्दै यो सहयोगले निर्वाचनको सफल व्यवस्थापनमा महत्त्वपूर्ण भूमिका खेल्ने विश्वास व्यक्त गर्नुभयो। भारतले सन् २००८ देखि नेपालका हरेक निर्वाचनमा प्राविधिक तथा लजिस्टिक सहयोग गर्दै आएको छ र हालसम्म विभिन्न निकायलाई गरी करिब २ हजार ४०० सवारीसाधन उपहार स्वरूप प्रदान गरिसकेको छ।
