मिनेसोटा काण्डपछि रक्षात्मक अवस्थामा डेमोक्र्याटहरू: ट्रम्पलाई कसरी काउन्टर दिने भन्नेमा अन्योल

न्युयोर्क- मिनेसोटामा अध्यागमन अपरेशनका क्रममा एक अमेरिकी आमा (रेनी गुड) को ज्यान गएपछि डेमोक्र्याटिक पार्टीभित्र ठुलो हलचल मच्चिएको छ। यसअघि मूल्यवृद्धि र स्वास्थ्य सेवालाई मुख्य एजेन्डा बनाएर चुनाव लड्ने तयारीमा रहेका डेमोक्र्याटहरूलाई अहिले ट्रम्पको आक्रामक आप्रवासन नीतिले नयाँ चुनौती थपिदिएको छ। पार्टीभित्र अहिले आक्रोश त छ, तर त्यसलाई कसरी राजनीतिक रणनीतिमा बदल्ने भन्नेमा नेताहरूबीच एकमत छैन।

डेमोक्र्याटहरू अहिले दुई धारमा बाँडिएका छन्। एलेक्जान्ड्रिया ओकासियो-कोर्टेज जस्ता केही नेताहरू ‘आईस’ (ICE) एजेन्सी नै खारेज गर्नुपर्ने र गृहमन्त्री क्रिस्टी नोमलाई महाअभियोग लगाउनुपर्ने पक्षमा छन्। अर्कातिर, केही नरमपन्थी नेताहरू भने एजेन्टहरूको शक्ति कटौती गर्ने कानुन ल्याउनुपर्ने बताउँछन्। रणनीतिकारहरूका अनुसार डेमोक्र्याटहरूले आफ्नो छवि सुधार्न ‘सुरक्षित सीमा’ र ‘मानवीय व्यवहार’ बीचको सन्तुलन मिलाउन आवश्यक छ। किनकि पछिल्लो सर्वेक्षणले देखाए अनुसार आप्रवासन र अपराध नियन्त्रणको मुद्दामा अझै पनि अमेरिकी जनताले डेमोक्र्याटभन्दा रिपब्लिकनलाई बढी विश्वास गर्छन्।

रिपब्लिकनहरूले भने अपराध र आप्रवासनलाई जोडेर आफ्नो पकड बलियो बनाउन खोजिरहेका छन्। तर, अर्कोतिर ट्रम्पको लोकप्रियता पनि यो मुद्दामा केही घटेको देखिएको छ। सन् २०२५ को मार्चमा ४९ प्रतिशत रहेको उनको अप्रूभल रेट अहिले ३८ प्रतिशतमा झरेको छ। कतिपय रिपब्लिकन नेताहरूलाई पनि आफ्नै एजेन्सीहरूको आक्रामक शैलीले आगामी चुनावमा घाटा लाग्न सक्ने डर छ। डेमोक्र्याटहरूले अहिले ट्रम्पले स्वास्थ्य सेवाको बजेट काटेर ‘आईस’ को दमनमा खर्च गरिरहेको आरोप लगाउँदै जनताको ध्यान तान्ने प्रयास गरिरहेका छन्।