ट्रम्पको ‘बोर्ड अफ पिस’ गठन: अर्जेन्टिनादेखि पाकिस्तानसम्मका १९ राष्ट्रको सहभागिता

न्युयोर्क-  राष्ट्रपति डोनाल्ड ट्रम्पले स्विट्जरल्याण्डमा आयोजित एक विशेष समारोहका बीच आफ्नो महत्त्वाकांक्षी परियोजना ‘बोर्ड अफ पिस’ (शान्ति बोर्ड) को शुभारम्भ गरेका छन्। यो नयाँ अन्तर्राष्ट्रिय संयन्त्रले मध्य पूर्व र विश्वभर शान्ति स्थापनामा महत्त्वपूर्ण भूमिका खेल्ने ट्रम्पको दाबी छ। अमेरिकाले यसलाई नयाँ अन्तर्राष्ट्रिय शान्ति संगठनको रूपमा व्याख्या गर्दै पुराना संस्थाहरूको विकल्प हुन सक्ने संकेत गरेको छ। ट्रम्पले “सबैजना यसको हिस्सा बन्न चाहेको” बताउँदै यसलाई ठुलो कूटनीतिक सफलता मानेका छन्।

यस हस्ताक्षर समारोहमा विभिन्न महादेशका १९ राष्ट्रका राष्ट्रप्रमुख तथा प्रतिनिधिहरूको उपस्थिति थियो। दक्षिण अमेरिकाबाट अर्जेन्टिनाका राष्ट्रपति जेभियर मिल्ली र पाराग्वेका राष्ट्रपति स्यान्टियागो पेना सहभागी भए। युरोप र एसियाको संगमका रूपमा आर्मेनिया, अजरबैजान, बुल्गेरिया, हंगेरी, कजाकिस्तान, कोसोभो, मंगोलिया र उज्बेकिस्तान जस्ता देशहरू यसमा जोडिएका छन्। हंगेरीका प्रधानमन्त्री भिक्टर ओर्बन र पाकिस्तानका प्रधानमन्त्री शाहबाज शरीफको उपस्थितिलाई अर्थपूर्ण रूपमा हेरिएको छ।

यसैगरी, मध्य पूर्वको भूराजनीतिलाई ध्यानमा राख्दै बहराइन, जोर्डन, मोरक्को, कतार, साउदी अरेबिया, टर्की र संयुक्त अरब इमिरेट्स (यूएई) का उच्च पदस्थ प्रतिनिधिहरूले पनि बोर्डमा हस्ताक्षर गरेका छन्। इन्डोनेसियाका राष्ट्रपति प्राबोवो सुब्यान्टोको सहभागिताले यसलाई एसियाली राष्ट्रहरूको समेत समर्थन रहेको देखाएको छ।