अत्यधिक चिसोका बाबजुद मिनेसोटामा विशाल अध्यागमन विरोधी प्रदर्शनको तयारी
न्युयोर्क- मिनेसोटामा शुक्रबार (जनवरी २३) ज्यानै जाने खालको खतरनाक चिसो मौसमको चेतावनीका बाबजुद हजारौँ प्रदर्शनकारीहरू सडकमा उत्रिने तयारीमा छन्। “आईस आउट अफ मिनेसोटा: डे अफ ट्रुथ एन्ड फ्रिडम” (ICE Out of Minnesota: Day of Truth and Freedom) नाम दिइएको यो विशाल प्रदर्शन र हडताल संघीय अध्यागमन एजेन्सी (ICE) को आक्रामक कारबाही र हालै भएको रेनी गुडको हत्याको विरोधमा आयोजना गरिएको हो।
मौसमविद्हरूले शुक्रबारको तापक्रम र हावाको बहाव माइनस ३० देखि ६० डिग्री फरेनहाइटसम्म झर्न सक्ने भन्दै “अत्यधिक चिसोको चेतावनी” जारी गरेका छन्। यस्तो मौसममा बाहिर निस्कनु खतरनाक हुने भए पनि आयोजकहरूले पछि नहट्ने निर्णय गरेका छन्। प्रदर्शनको समर्थनमा राज्यभरका धेरै व्यवसायहरू, क्याफेहरू र पसलहरू शुक्रबार बन्द रहनेछन् भने मानिसहरूलाई काम, स्कुल र किनमेलमा नजान आग्रह गरिएको छ।
प्रदर्शनकारीहरूले मिनियापोलिसको यू.एस. बैंक स्टेडियमबाट टार्गेट सेन्टरसम्म र्याली निकाल्ने योजना बनाएका छन्। उता सहरमा तैनाथ हजारौँ संघीय एजेन्टहरूले सुरक्षा कडा पारेका छन् भने सरकारी भवनहरूमा पहरा दिइरहेका छन्। गभर्नर टिम वाल्ज र स्थानीय नेताहरूले संघीय सरकारको हस्तक्षेपको विरोध गरिरहँदा ट्रम्प प्रशासनले भने पछि नहट्ने संकेत दिएको छ। चिसोका कारण विद्यालयहरू बन्द गरिए पनि सडकमा भने राजनीतिक र सामाजिक तापक्रम उच्च विन्दुमा पुगेको छ।
