जापान सबैभन्दा भरपर्दो विकास साझेदार, राष्ट्रपति पौडेल

टोकियो- जापान भ्रमणमा रहेका राष्ट्रपति रामचन्द्र पौडेलले आज त्यहाँका सम्राट नारुहितोसँग एउटा विशेष भेटघाट गरेका छन्। टोकियोस्थित ‘इम्पेरियल प्यालेस’ मा भएको यो शिष्टाचार भेटमा दुई देशको ७० वर्ष लामो मित्रता र सहयोगको चर्चा भयो।

भेटका क्रममा राष्ट्रपति पौडेलले जापान नेपालको ‘सबैभन्दा भरपर्दो विकास साझेदार’ भएको बताए। उनले भने, “जापानले हामीलाई शिक्षा, स्वास्थ्य, कृषि र पूर्वाधार विकासमा जसरी सघाएको छ, त्यसबाट हामी नेपालीहरूले ठुलो लाभ पाएका छौँ।” उनले बुद्धको जन्मस्थल लुम्बिनीले दुई देशका जनताको मन जोड्ने काम गरेको पनि बताए।

रोचक कुरा त के छ भने, सम्राट नारुहितोलाई आफ्नो पुरानो नेपाल भ्रमण अझै झलझली याद रहेछ। सन् १९८७ मा राजकुमार छँदा उनी नेपाल आएका थिए। उनले पोखराको सराङकोट जाँदा महिलाहरूले गाग्रीमा पानी बोकेको दृश्यले नै आफूलाई पानीसम्बन्धी अध्ययन गर्न प्रेरणा दिएको सुनाए। यही आत्मीय कुराकानीका बिच राष्ट्रपति पौडेलले सम्राट र साम्राज्ञीलाई फेरि नेपाल घुम्न आउन निम्तो पनि दिएका छन्।

चारदिने भ्रमणका लागि सोमबार जापान पुगेका राष्ट्रपति पौडेलले आजै जापानी प्रधानमन्त्रीसँग पनि भेट्ने कार्यक्रम छ। उनी भोलि (बुधबार) स्वदेश फर्किनेछन्।