ओबामा दम्पतीलाई ‘बाँदर’ बनाएर भिडियो हालेपछि ट्रम्प विवादमा: पोस्ट हटाइयो, तर माफी माग्न अस्वीकार
वासिङ्टन- अमेरिकी राष्ट्रपति डोनाल्ड ट्रम्प फेरि एकपटक गम्भीर विवादमा फसेका छन्। उनले पूर्वराष्ट्रपति बाराक ओबामा र उनकी श्रीमती मिसेल ओबामालाई ‘बाँदर’ का रूपमा देखाइएको एउटा नस्लवादी भिडियो सामाजिक सञ्जालमा सेयर गरेका थिए। चौतर्फी आलोचना र आफ्नै पार्टीका नेताहरूको दबाबपछि उनले त्यो पोस्ट त हटाए, तर माफी माग्न भने सिधै अस्वीकार गरेका छन्।
के थियो भिडियोमा? ट्रम्पले सेयर गरेको करिब एक मिनेट लामो भिडियोमा सुरुमा २०२० को चुनावमा धाँधली भएको भन्ने झुटा दाबीहरू थिए। तर, भिडियोको अन्त्यमा अचानक ओबामा दम्पतीको अनुहारलाई कार्टुन बाँदरको टाउकोमा जोडेर देखाइएको थियो। पृष्ठभूमिमा “द लायन स्लिप्स टुनाइट” भन्ने गीत बजिरहेको थियो।
यो भिडियो बाहिरिनु र ‘ब्ल्याक हिस्ट्री मन्थ’ (अश्वेत इतिहास महिना) चलिरहनु एकैचोटि परेको छ, जसले गर्दा अमेरिकामा ठुलो आक्रोश पैदा भएको छ। डेमोक्र्याट मात्र होइन, रिपब्लिकन सिनेटर टिम स्कट (जो सिनेटमा एकमात्र अश्वेत रिपब्लिकन हुन्) ले पनि यसलाई “ह्वाइट हाउसबाट आएको सबैभन्दा नस्लवादी कुरा” भन्दै कडा आपत्ति जनाएका थिए।
‘गल्ती स्टाफको हो’ शुक्रबार पत्रकारहरूसँग कुरा गर्दै ट्रम्पले भने, “मैले त्यो भिडियोको सुरुको भाग मात्र हेरेको थिएँ, जुन ठीकै थियो। अन्तिमको भाग मैले देखिनँ।” उनले यो गल्ती आफ्नो नभई ह्वाइट हाउसका कुनै स्टाफको भएको र थाहा पाउनेबित्तिकै हटाइएको दाबी गरे। तर, माफी माग्ने कुरामा भने उनले अडान लिँदै भने, “मैले कुनै गल्ती गरेको छैन, त्यसैले माफी माग्दिनँ।” ह्वाइट हाउसकी प्रेस सेक्रेटरी क्यारोलिन लेभिटले सुरुमा यसलाई “इन्टरनेट मिम” भन्दै बचाउ गरेकी थिइन्, जसले आगोमा घिउ थप्ने काम गर्यो।
