मिलान-कोर्टिना ओलम्पिकको भव्य सुरुआत: अमेरिकाको शानदार प्रदर्शन

इटाली- शुक्रबार राति इटालीमा ‘मिलान-कोर्टिना विन्टर ओलम्पिक २०२६’ को भव्य उद्घाटन भएको छ। इतिहासमै पहिलो पटक दुई फरक सहर (मिलान र कोर्टिना) मा एकैसाथ ओलम्पिक दीप प्रज्वलन गरेर खेलको औपचारिक सुरुआत गरियो।

मिलानको सान सिरो रंगशालामा भएको उद्घाटन समारोहमा चर्चित गायिका मरिया क्यारीले आफ्नो जादुमयी प्रस्तुति दिइन् भने हलिउड अभिनेत्री चार्लीज थेरोनले नेल्सन मण्डेलाको शान्ति सन्देश पढेर सुनाइन्। यसपालिको थिम ‘आर्मोनिया’ (सद्भाव) राखिएको छ।

खेलको कुरा गर्दा, अमेरिकाले सुरुमै गज्जबको प्रदर्शन गरेको छ। ‘फिगर स्केटिङ’ को टिम इभेन्टमा अमेरिका अहिले शीर्ष स्थानमा छ। म्याडिसन चोक र इभान बेट्सको जोडीले डान्समा उत्कृष्ट नतिजा ल्यायो भने २० वर्षीया एलिसा लिउले पनि राम्रो प्रदर्शन गरिन्। अहिले अमेरिका २५ अंकसहित पहिलो, जापान २३ अंकसहित दोस्रो र आयोजक इटाली २२ अंकसहित तेस्रो स्थानमा छन्।

उता ‘कर्लिङ’ खेलमा पनि अमेरिकी टोली (कोरी ड्रपकिन र कोरी थिस) ले कमाल गरेको छ। उनीहरूले क्यानडा र चेक रिपब्लिकलाई हराउँदै अहिलेसम्म खेलेका चारै खेल जितेर अपराजित यात्रा कायमै राखेका छन्।

सबैभन्दा बढी चर्चा भने अमेरिकी स्की खेलाडी लिन्डसे भोनको भयो। एक हप्ताअघि मात्रै खुट्टाको लिगामेन्ट च्यातिएकी भोनले हिम्मत हारिनन्। उनले शुक्रबार अभ्यास खेल पूरा गरिन्, जसले गर्दा उनले आइतबारको मुख्य खेलमा भाग लिन पाउने बाटो खुलेको छ। ७४ माइल प्रतिघन्टाको गतिमा कुदेकी भोनले आफ्नो चोटलाई खेलको तगारो बन्न दिइनन्।

उद्घाटन समारोहमा अमेरिकी उपराष्ट्रपति जेडी भान्स पनि उपस्थित थिए। अब अर्को दुई हप्तासम्म इटालीको चिसो हिउँमा खेलाडीहरूको तातो प्रतिस्पर्धा हेर्न पाइनेछ।