प्रदर्शनकारीको मृत्युपछि ट्रम्पका आप्रवासन अधिकारीहरू कंग्रेसमा बयान दिँदै
वासिङ्टन- अमेरिकी राष्ट्रपति डोनाल्ड ट्रम्पको ‘मास डिपोर्टेसन’ (सामूहिक देश निकाला) योजना लागू गर्ने प्रमुख तीन निकायका प्रमुखहरूले (मंगलबार) अमेरिकी कंग्रेसमा बयान दिँदै छन्। मिनियापोलिसमा सुरक्षा अधिकारीहरूको गोलीबाट दुई जना प्रदर्शनकारीको मृत्यु भएपछि ट्रम्प प्रशासनको आप्रवासन नीतिमाथि गम्भीर प्रश्न उठेको छ।
हाउस कमिटी अन होमल्यान्ड सेक्युरिटीको अगाडि ‘आइस’ का कार्यवाहक निर्देशक टड लायन्स, ‘सिबिपी’ का प्रमुख रड्नी स्कट र ‘युएससिआइएस’ का निर्देशक जोसेफ एडलो उपस्थित हुनेछन्। केही समयअघि मिनियापोलिसमा आप्रवासन एजेन्टहरूले चलाएको गोली लागेर एलेक्स प्रीति र रेनी गुड नामका दुई प्रदर्शनकारीको ज्यान गएको थियो।
सांसदहरूले खासगरी आइसका निर्देशक लायन्सले अदालतको वारेन्ट विना नै घरमा पसेर मान्छे पक्रन मिल्ने भनी जारी गरेको विवादास्पद मेमो र सिबिपीले सीमा क्षेत्र छोडेर सहरभित्रै मान्छे पक्रने काम थालेको विषयमा कडा प्रश्नहरू सोध्ने सम्भावना छ। उता ट्रम्प प्रशासनले भने अपराधीहरूले प्रहरीमाथि आक्रमण बढाइरहेकाले देशलाई सुरक्षित राख्न र अपराधीलाई निकाल्न कडा कदम चाल्नुपरेको दाबी गर्दै आएको छ।
