न्युयोर्कको म्यानहटनमा गोली चल्यो: पसलभित्रै एक जनाको मृत्यु
न्युयोर्क – न्युयोर्क सहरको मिडटाउन म्यानहटनमा रहेको ‘सेभेन इलेभेन’ (7-Eleven) स्टोरभित्र गोली चल्दा एक जनाको मृत्यु भएको छ।
प्रहरी अधिकारीहरूका अनुसार, ३९औँ स्ट्रिट नजिकैको आठौँ एभिन्युमा रहेको पसलभित्र बिहान करिब १०:३० बजे यो घटना भएको हो। अन्दाजी ४० वर्षका एक पुरुषको घाँटीमा गोली लागेको थियो। उद्धार टोली पुग्दा उनको घटनास्थलमै मृत्यु भइसकेको थियो। मृतकको नाम भने अझै खुलेको छैन।
गोली हान्ने व्यक्ति गाढा हरियो रङको ज्याकेट, कालो मास्क र कालो पाइन्ट लगाएर भागेको प्रहरीले बताए। ऊ कालो झोला बोकेर आठौँ एभिन्यु हुँदै दक्षिणतर्फ दौडिएको देखिएको छ। प्रहरीले घटनास्थलबाट प्रमाणहरू संकलन गरेर सीसीटीभी फुटेजको आधारमा शंकास्पद व्यक्तिको खोजी गरिरहेको छ।
