रेल यात्रुलाई सास्ती: एक महिनासम्म ढिलाइ हुने, घरबाटै काम गर्न सुझाव
न्युयोर्क- न्यु जर्सी ट्रान्जिट र एमट्र्याक का यात्रुहरूले अबको एक महिना सास्ती खेप्नुपर्ने भएको छ। ह्याकेनस्याक नदीमाथिको पुरानो ‘पोर्टल ब्रिज’ को निर्माण कार्य सुरु भएकाले मार्च १४ सम्म रेल सेवा प्रभावित हुने भएको हो।
सन् १९१० मा बनेको यो पुरानो पुललाई नयाँ ‘पोर्टल नर्थ ब्रिज’ ले विस्थापित गर्ने काम चलिरहेको छ। यसका कारण नेवार्क र सिकाकस बिचको एउटा मात्र ट्रयाक सुचारु हुनेछ। नतिजास्वरूप, न्युयोर्क पेन स्टेसन आउने-जाने रेलहरूको संख्या घट्नेछ र यात्राको समय पनि लम्बिनेछ।
रेलवे अधिकारीहरूले यात्रुलाई सकेसम्म घरबाटै काम गर्न सुझाव दिएका छन्। विशेषगरी बिहान ७ देखि ९ र बेलुका ४ देखि ७ बजेको भीडभाड हुने समयमा यात्रा नगर्न आग्रह गरिएको छ। यात्रुको सहजताका लागि रेलको टिकट ‘पाथ’ ट्रेन, फेरी र बसमा पनि प्रयोग गर्न मिल्ने व्यवस्था मिलाइएको छ।
