न्युयोर्कमा भारी हिमपातको चेतावनी, मेयर मामदानीले विशेष पत्रकार सम्मेलन गर्दै
न्युयोर्क- न्युयोर्कमा आइतबारदेखि सोमबारसम्म एक फिट वा सोभन्दा बढी हिमपात हुने प्रक्षेपण गरिएपछि ‘ब्लिजार्ड’ (भीषण हिमआँधी) को चेतावनी जारी गरिएको छ। न्युयोर्क सहर र लङ आइल्याण्ड क्षेत्रमा नौ वर्षपछि पहिलोपटक यस्तो चेतावनी दिइएको हो।
हिमआँधीको जोखिमलाई मध्यनजर गर्दै न्युयोर्कका मेयर जोहराद मामदानीले शनिबार दिउँसो पत्रकार सम्मेलन गरी पूर्वतयारीबारे जानकारी दिने अपेक्षा गरिएको छ। गत महिनाको हिमपातका क्रममा अत्यधिक चिसोका कारण १९ जनाको ज्यान गएपछि यसपटक मेयर मामदानीको प्रशासनमाथि सुरक्षा र पूर्वतयारीलाई लिएर ठूलो दबाब छ।
राष्ट्रिय मौसम सेवाका अनुसार प्रतिघण्टा दुई इन्चका दरले हिउँ पर्न सक्ने र ५५ माइल प्रतिघण्टाको वेगमा हावा चल्ने सम्भावना छ। यसले गर्दा सडकमा यात्रा गर्न अत्यन्तै जोखिमपूर्ण हुने र दृश्यता निकै कम हुने बताइएको छ। न्युयोर्कका पाँचवटै बरो, सेन्ट्रल जर्सी र नासाउ काउन्टीमा एक फिटसम्म हिउँ पर्न सक्ने अनुमान छ।
मेयर मामदानीले सडकमा बस्ने घरविहीन व्यक्तिहरूलाई सुरक्षित आश्रयस्थलमा लैजान ‘इन्क्याम्पमेन्ट स्विप’ (बस्ती हटाउने अभियान) फेरि सुरु गरेका छन्। यसअघिको आँधीमा विद्यालयहरूलाई रिमोट लर्निङ (अनलाइन कक्षा) मा लगिएको थियो, तर यसपटक त्यस्तो निर्णय हुने वा नहुनेबारे पत्रकार सम्मेलनमा स्पष्ट हुनेछ।
गएको महिनाको हिउँ अझै पग्लिनसकेको अवस्थामा यो नयाँ आँधी आउन लागेको हो। यद्यपि, यसपटक तापक्रम निकै कम नहुने भएकाले बुधबारसम्ममा हिउँ पग्लिन थाल्ने मौसमविद्हरूको भनाइ छ।
