आईसीईद्वारा हिरासत केन्द्रका लागि गोदामहरू खरिद
सोकोरो, टेक्सास- अमेरिकी अध्यागमन अधिकारीहरूले देशका विभिन्न स्थानमा रहेका ठूला गोदामहरूलाई गोप्य रूपमा खरिद गरी हिरासत केन्द्रमा बदल्ने अभियान तीव्र पारेका छन्। अमेरिकी अध्यागमन तथा भन्सार प्रवर्तन (आईसीई) ले स्थानीय अधिकारीहरूलाई कुनै पूर्वजानकारी नदिई ४५ अर्ब डलरको विस्तार योजनाअन्तर्गत यस्ता भौतिक संरचनाहरू किनिरहेको हो।
टेक्सासको सोकोरो सहरमा संघीय सरकारले १२ करोड २८ लाख डलरमा ८ लाख २६ हजार वर्ग फिटको विशाल गोदाम खरिद गरेपछि स्थानीय जनप्रतिनिधिहरू अचम्ममा परेका छन्। सहरका मेयर रुडी क्रुजले संघीय सरकारले आफूहरूसँग कुनै समन्वय वा पत्राचार नगरेको भन्दै असन्तुष्टि व्यक्त गरे। विरोध आउने डरले सरकारले गोप्य रूपमा यस्तो कदम चालेको हुनसक्ने उनको बुझाइ छ।
आईसीईले हालसम्म एरिजोना, जर्जिया, मेरिल्याण्ड, पेन्सिलभेनिया र टेक्सासमा कम्तीमा सातवटा ठूला गोदामहरू खरिद गरिसकेको छ। ट्रम्प प्रशासनले हिरासत क्षमता ७५ हजारबाट बढाएर ९२ हजार पुर्याउने लक्ष्य राखेको छ। यसका लागि ८ वटा ठूला हिरासत केन्द्रहरू (जसमा ७ देखि १० हजारसम्म मानिस राख्न सकिनेछ) र १६ वटा साना क्षेत्रीय प्रशोधन केन्द्रहरू बनाउने सरकारको योजना छ।
अध्यागमन विभाग (डीएचएस) ले यी संरचनाहरूलाई ‘गोदाम’ भन्नुको सट्टा ‘राम्रो संरचना भएका हिरासत केन्द्र’ भएको दाबी गरेको छ। यद्यपि, स्थानीय समुदायले भने यस्ता केन्द्रहरूले खानेपानी र ढल जस्ता सार्वजनिक सेवामा दबाब दिने र स्थानीय कर राजस्वमा समेत घाटा पुर्याउने भन्दै चिन्ता व्यक्त गरेका छन्।
जर्जियाको सोसल सर्कल सहरमा त सहरको कुल जनसंख्या ५ हजार मात्र रहेकोमा ७ हजार ५ सय क्षमताको हिरासत केन्द्र बनाउन लागिएको छ। स्थानीय अधिकारीहरूले यति ठूलो संख्यामा मानिसहरू राख्दा सहरको पूर्वाधारले धान्न नसक्ने चेतावनी दिएका छन्। आईसीईले भने यी केन्द्रहरू सैन्य सम्झौतामार्फत निर्माण गरिरहेको छ, जसले गर्दा सरकारलाई धेरै प्रक्रियागत झन्झट र सार्वजनिक जवाफदेहिताबाट बच्न सजिलो भएको विज्ञहरूको तर्क छ।
