मध्यपूर्वका ६ देशबाट कर्मचारी फिर्ता हुन अमेरिकाको आदेश
न्युयोर्क- अमेरिकी विदेश मन्त्रालयले जोर्डन, बहराइन, इराक, कतार, कुवेत र संयुक्त अरब इमिरेट्स (यूएई) मा रहेका अत्यावश्यक बाहेकका आफ्ना सरकारी कर्मचारी र उनीहरूका परिवारलाई तत्काल देश छाड्न आदेश दिएको छ।
इरानबाट हुन सक्ने ड्रोन र क्षेप्यास्त्र आक्रमणको खतरा र उडानमा आउन सक्ने अवरोधलाई हेर्दै यो निर्णय गरिएको मन्त्रालयले जनाएको छ। मन्त्रालयका अनुसार जोर्डन, बहराइन र यूएईमा आतङ्कवादी आक्रमणको जोखिम छ भने इराकमा हिंसा र अपहरणको उच्च सम्भावना छ।
अमेरिका र इजरायलले इरानविरुद्ध सैन्य कारबाही सुरु गरेपछि यी ६ दूतावासबाट कर्मचारीलाई फिर्ता बोलाइएको यो पहिलो पटक हो। इरानले विशेषगरी अमेरिकी सैन्य र कूटनीतिक निकायलाई लक्षित गरी आक्रमण गरिरहेको छ। साउदी अरब र कुवेतमा रहेको अमेरिकी दूतावासमा पनि आक्रमण भएको छ। युद्ध सुरु भएयता यस क्षेत्रका धेरै अमेरिकी दूतावासले आफ्ना कर्मचारी र नागरिकलाई सुरक्षित स्थानमै रहन भनेका छन्।
कर्मचारी फिर्ता बोलाउनुको अर्थ दूतावास पूर्ण रूपमा बन्द गर्नु भने होइन। तर, कुवेतको दूतावास भने अर्को सूचना नआएसम्मका लागि बन्द गरिएको छ। अन्य दूतावासमा मुख्य कर्मचारी मात्र रहनेछन्।
मन्त्रालयले मध्यपूर्वमा रहेका सबै अमेरिकी नागरिकलाई तत्काल ती देश छाड्न भनेको छ। तर, धेरै हवाई कम्पनीले उडान रोकेकाले उनीहरूलाई तुरुन्तै फर्किन गाह्रो छ। अमेरिकी सरकारले अहिलेसम्म आफ्ना नागरिकको उद्धारका लागि छुट्टै उडान सुरु गरेको छैन।
