मार्-ए-लागोबाटै इरानमाथि ट्रम्पको भीषण आक्रमण
फ्लोरिडा — अमेरिकी राष्ट्रपति डोनाल्ड ट्रम्पले फ्लोरिडास्थित आफ्नो निजी रिसोर्ट ‘मार्-ए-लागो’ बाट इरानविरुद्ध ‘अपरेसन एपिक फ्युरी’ सुरु गरेका छन्। ह्वाइट हाउसले सार्वजनिक गरेको तस्बिरमा ट्रम्पले त्यहीँ बनाइएको एक अस्थायी कमान्ड सेन्टरबाट सैन्य कारबाहीको नेतृत्व गरिरहेको देखिन्छ। यस आक्रमणमा अमेरिकी बी-२ बमवर्षक विमानहरूले इरानी सैन्य अखडाहरूलाई निशाना बनाएका छन् भने इजरायली सेनाको सहयोगमा इरानी सर्वोच्च नेता आयतोल्लाह अली खामेनी मारिएको दाबी गरिएको छ।
ट्रम्पले शनिबार बिहानै मार्-ए-लागोबाटै इरानमा ‘ठूलो र निरन्तर’ सैन्य कारबाही भइरहेको घोषणा गरे। उनले दोस्रो कार्यकालको सुरुवाती नौ हप्तामध्ये सात हप्ता यहीँ बिताएका छन् र यसअघि भेनेजुएलाका राष्ट्रपति निकोलास मादुरोलाई पक्राउ गर्ने अपरेसनको निर्देशन पनि यहीँबाट दिएका थिए। वासिङ्टनस्थित ह्वाइट हाउसको मुख्य सिचुएसन रुममा भने उपराष्ट्रपति जेडी भेन्सले कमान्ड सम्हालिरहेका छन्।
सुरक्षा विज्ञहरूले राष्ट्रपति ह्वाइट हाउस बाहिरबाट संवेदनशील सैन्य गतिविधिमा संलग्न हुँदा सुरक्षा चुनौती बढ्ने भन्दै आलोचना गरेका छन्। यद्यपि, ट्रम्पले मार्-ए-लागोलाई नै आफ्नो मुख्य कार्यथलो बनाउँदै विदेशी नेताहरूसँगको भेटघाट र सैन्य रणनीति तय गर्ने कामलाई निरन्तरता दिएका छन्। तनाव बढ्दै गएपछि स्थानीय प्रशासनले मार्-ए-लागो वरपरका सडकहरू बन्द गरेर सुरक्षा व्यवस्था कडा पारेको छ।
