न्युयोर्कका मेयर मामदानीको निवास बाहिरको आक्रमण ‘आइएसआइएस प्रेरित’ आतङ्कवाद भएको प्रहरीको दाबी
न्युयोर्क — न्युयोर्कका मेयर जोहरान मामदानीको सरकारी निवास ‘ग्रेसी म्यान्सन’ बाहिर शनिबार भएको विष्फोटक आक्रमणको घटनालाई प्रहरीले ‘आइएसआइएसबाट प्रेरित आतङ्कवाद’ को रूपमा अनुसन्धान सुरु गरेको छ। न्युयोर्क प्रहरी कमिश्नर जेसिका टिसले सोमबार आयोजित पत्रकार सम्मेलनमा उक्त जानकारी दिएकी हुन्।
प्रहरीका अनुसार शनिबार एक ‘एन्टी-इस्लाम’ समूह र त्यसको प्रतिवादमा उत्रिएको समूहबीच झडप भइरहेका बेला दुईवटा घरेलु विष्फोटक उपकरण प्रहार गरिएको थियो। अनुसन्धानका क्रममा ती उपकरणहरूमा ‘टीएटीपी’ नामक अत्यन्तै खतरनाक र अस्थिर विष्फोटक पदार्थ प्रयोग गरिएको भेटिएको छ। कमिश्नर टिसले यी उपकरणहरूले गम्भीर चोट पुर्याउन वा ज्यान समेत लिन सक्ने बताइन्।
प्रहरीले यस घटनामा संलग्न रहेको आरोपमा पेन्सिलभेनियाबाट आएका दुई युवक— अमिर बालात र इब्राहिम कायुमीलाई पहिचान गरेको छ। उनीहरू विरुद्ध अब संघीय अदालतमा मुद्दा चलाइनेछ। मेयर मामदानीले ती अभियुक्तहरू न्युयोर्कमा हिंसा फैलाउन र आतङ्कवादी गतिविधि गर्नकै लागि अर्को राज्यबाट आएको बताएका छन्। यद्यपि, प्रहरीले यस घटनाको सम्बन्ध हाल मध्यपूर्वमा इरानसँग भइरहेको युद्धसँग जोडिएको कुनै प्रमाण फेला नपरेको स्पष्ट पारेको छ।
न्युयोर्कको इतिहासमा पहिलो मुस्लिम मेयर रहेका मामदानीले उक्त प्रदर्शनलाई ‘श्वेत सर्वोच्चतामा आधारित घृणित कार्य’ को संज्ञा दिएका छन्। घटनाको समयमा आफू र श्रीमती निवासमा नरहेको जानकारी दिँदै उनले भने, “मुस्लिम विरोधी कट्टरता मेरा लागि नयाँ कुरा होइन, तर म शान्तिपूर्ण विरोध प्रदर्शन गर्न पाउने अधिकारको सधैँ रक्षा गर्नेछु, चाहे म प्रदर्शनकारीको विचारसँग सहमत नहोऊँ।”
न्युयोर्क प्रहरीले समयमै सक्रियता देखाएर अभियुक्तहरूलाई नियन्त्रणमा लिएका कारण ठूलो क्षति हुन नपाएको मेयरले बताए। यस घटनापछि न्युयोर्कका सार्वजनिक स्थान र मुस्लिम समुदायका धार्मिक स्थलहरूमा सुरक्षा सतर्कता थप बढाइएको छ।
