लिपुलेक हुँदै मानसरोवर यात्राबारे भारत र चीनलाई नेपालको स्पष्ट सन्देश
काठमाडौं- नेपाली भूमि लिपुलेक हुँदै कैलाश मानसरोवर यात्रा गराउने विषयमा नेपाल सरकारले भारत र चीन दुवैलाई आफ्नो प्रस्ट अडान सुनाएको छ। परराष्ट्र मन्त्रालयले कूटनीतिक माध्यमबाट दुवै छिमेकी देशलाई नेपालको आधिकारिक धारणा जानकारी गराएको हो।
मन्त्रालयले आइतबार विज्ञप्ति निकाल्दै उक्त क्षेत्रमा सडक बनाउने, सीमा व्यापार गर्ने वा तीर्थयात्रा गराउने जस्ता कुनै पनि काम नगर्न भारतलाई निरन्तर आग्रह गर्दै आएको कुरा सम्झाएको छ। मन्त्रालयका प्रवक्ता लोकबहादुर पौडेल क्षेत्रीले लिपुलेक नेपालकै भूभाग हो भनेर चीनलाई पनि आधिकारिक रूपमा जानकारी गराइसकेको स्पष्ट पारे।
सन् १८१६ को सुगौली सन्धि अनुसार महाकाली नदी पूर्वका लिम्पियाधुरा, लिपुलेक र कालापानी नेपालको अभिन्न भूभाग भएको कुरामा सरकार स्पष्ट र अडिग रहेको मन्त्रालयले जनाएको छ। ऐतिहासिक सन्धि, नक्सा र प्रमाणका आधारमा भारतसँगको सीमा समस्या कूटनीतिक कुराकानीबाटै समाधान गर्न सरकार सधैँ तयार रहेको पनि मन्त्रालयले प्रस्ट पारेको छ।
