आमाहरूलाई मासिक बोनस दिने उम्मेदवार ज्याकको प्रस्ताव
न्युयोर्क- म्यानहट्टनबाट कंग्रेस सदस्यको चुनाव लड्न लागेका ज्याक स्लोसबर्गले आमाहरूका लागि नयाँ योजना अघि सारेका छन्। उनले सरकारले दिने वार्षिक कर छुटको सट्टा आमाहरूलाई हरेक महिना ‘बोनस’ दिनुपर्ने प्रस्ताव गरेका हुन्।
एक कार्यक्रममा बोल्दै ज्याकले राष्ट्रपति ट्रम्पको महल (बालरुम) बनाउन खर्च हुने बजेट कटौती गरेर साधारण परिवारलाई सहयोग गर्नुपर्ने बताए। उनले भने, “ट्रम्पलाई नाच्ने ठाउँका लागि अर्बौं चाहिएको छ, तर म त्यो पैसा काम गर्ने परिवारलाई दिन चाहन्छु।”
कार्यक्रममा उनकी आमा क्यारोलिन केनेडी पनि उपस्थित थिइन्। उनले ज्याकको यो योजनाले आमा र छोराछोरीलाई तुरुन्तै मद्दत पुग्ने भन्दै छोराको समर्थन गरिन्। ज्याक अहिले अवकाश लिन लागेका नेता जेरी नाडलरको ठाउँमा चुनाव लड्दैछन्। अर्को महिना हुने चुनाव जितेमा उनी नोभेम्बरको मुख्य निर्वाचनमा भिड्नेछन्।
