अमेरिका र इरानबीच ऐतिहासिक शान्ति सम्झौता, लेबनानसहित सबै मोर्चामा युद्ध रोकिने

न्युयोर्क- अमेरिका र इरानबीच ऐतिहासिक शान्ति सम्झौता भएको छ। पाकिस्तानी प्रधानमन्त्री शहबाज सरिफले सोमबार बिहान दुई देशबीच सघन वार्ता पश्चात यस्तो सम्झौता भएको घोषणा गरेका छन्।

यो सम्झौताको औपचारिक हस्ताक्षर समारोह आगामी जुन १९ मा स्वीट्जरल्याण्डमा हुने तय भएको छ। सामाजिक सञ्जाल एक्समा एक वक्तव्य जारी गर्दै प्रधानमन्त्री सरिफले दुवै पक्षले लेबनानसहित सबै मोर्चामा सैन्य कारबाही तत्काल र स्थायी रूपमा बन्द गर्ने घोषणा गरेको जानकारी दिए। सम्झौता कार्यान्वयनको तयारीका लागि यसै साता मध्यस्थकर्ताहरूले विभिन्न बैठकहरू आयोजना गर्ने समेत उनले बताए। सरिफका अनुसार यी छलफलहरूले औपचारिक हस्ताक्षर समारोहको ठोस आधारशिला तयार गर्नेछन्।

द्वन्द्वको कूटनीतिक समाधानका लागि अमेरिका र इरानले देखाएको प्रतिबद्धताप्रति आभार व्यक्त गर्दै सरिफले मध्यस्थता प्रक्रियामा क्षेत्रीय साझेदारहरूले खेलेको भूमिकाको उच्च प्रशंसा गरे।

यो घोषणाको केही मिनेट पछि नै अमेरिकी राष्ट्रपति डोनाल्ड ट्रम्पले पनि अमेरिका–इरान सम्झौता पूर्ण भएको पुष्टि गरेका छन्। साथै उनले इरानी बन्दरगाहहरू विरुद्ध लगाइएको अमेरिकी नौसैनिक नाकाबन्दी तत्काल हटाउन अनुमति दिइसकेको कुरा स्पष्ट पारे।