हर्मूज जलमार्ग बन्द गरेको इरानको घोषणा, अमेरिकाले भन्यो– ‘खुला छ’
न्युयोर्क- विश्वकै प्रमुख व्यापारिक जलमार्ग हर्मूज जलसन्धिको अवस्था अहिले फेरिएको छ। ओमानको खसाब क्षेत्रबाट प्राप्त जानकारी अनुसार, एक महिना अघिको तुलनामा अहिले त्यहाँ ठूला मालवाहक जहाजको सङ्ख्या निकै घटेको छ। अघिल्लो महिना तनावका कारण रोकिएका धेरैजसो ठूला जहाज त्यहाँबाट गइसकेका छन् र अहिले साना डुङ्गाहरू मात्र देखिन्छन्।
यसैबीच, इरानले शनिबार हर्मूज जलसन्धि बन्द गरेको औपचारिक घोषणा गरेको छ। अमेरिकाले शान्ति सम्झौता र इजरायलले दक्षिण लेबनानमा युद्धविरामको सर्त उल्लङ्घन गरेको आरोप लगाउँदै इरानले यो बाटो बन्द गर्ने निर्णय लिएको हो।
तर, अमेरिकी केन्द्रीय कमाण्डले भने इरानको दाबीलाई अस्वीकार गर्दै हर्मूज जलमार्ग अझै खुला रहेको बताएको छ। अमेरिकाका अनुसार त्यहाँबाट व्यावसायिक जहाजको आउजाउ झनै बढिरहेको छ। यसरी व्यापारिक रूपमा महत्त्वपूर्ण मानिने यो जलमार्गको विषयमा इरान र अमेरिकाले फरक-फरक दाबी गरेका छन्।
