बाइडेनको पुराना कुराकानीको अडियो सार्वजनिक हुन सक्ने

न्युयोर्क- अमेरिकी न्याय विभागले पूर्व राष्ट्रपति जो बाइडेनको पुराना अडियो रेकर्डहरू सार्वजनिक गर्न सक्ने भएको छ। यदि अदालतले तुरुन्तै रोक नलगाएमा बाइडेनका यी अडियोहरू बाहिर आउनेछन्।

यो अडियो सन् २०१६ र २०१७ ताकाको हो। त्यतिबेला बाइडेनले आफ्ना पुस्तक लेखकसँग कुराकानी गरेका थिए। उक्त कुराकानीका क्रममा बाइडेनको बोली र सम्झना शक्ति कमजोर देखिएको दाबी गरिएको छ। विरोधी पार्टीका नेताहरूले यो अडियो माग गरिरहेका छन्।

कन्जर्भेटिभ समूह ‘हेरिटेज फाउन्डेसन’ ले पनि यो अडियो सार्वजनिक गर्न माग गर्दै अदालतमा मुद्दा हालेको थियो। न्यायाधीश ड्याब्नी फ्रेडरिकले अडियो सार्वजनिक गर्न मिल्ने प्रारम्भिक फैसला गरेकी छन्। तर बाइडेनका वकिलहरूले यसको विरोध गर्दै माथिल्लो अदालतमा पुनरावेदन गरेका छन्। त्यसैले अहिलेलाई अदालतले तीन हप्ताको समय दिएको छ।

अडियोमा गोप्य विषय र बिरामी जस्ता संवेदनशील कुराहरू हटाइएको अदालतले जनाएको छ। यसमा विशेष गरी विदेशी नीति र बाइडेनले सन् २०१६ मा चुनाव नलड्ने निर्णयबारे कुराकानी छ।

पहिले बाइडेन राष्ट्रपति हुँदा न्याय विभागले यो अडियो दिन मानेको थिएन। तर अहिले ट्रम्प राष्ट्रपति बनेपछि विभागले आफ्नो निर्णय बदलेको छ। अदालतले रोक नलगाएमा अबको तीन हप्ताभित्र यो अडियो कंग्रेसको समितिलाई बुझाइनेछ।