म्यानहटनमा जोखिमपूर्ण भवन वरपरको सडक खुल्यो, केही स्थानमा अझै प्रतिबन्ध

न्युयोर्क- न्युयोर्कस्थित म्यानहटनमा निर्माणाधीन एउटा अग्लो भवनको पिलर बाङ्गिएपछि बन्द गरिएको सडक बुधबार साँझदेखि खुला गरिएको छ। अधिकारीहरूले भवन अहिले स्थिर अवस्थामा रहेको बताए पनि वरपरका केही घरहरूमा भने मानिसलाई जान अझै रोक लगाइएको छ।

सुरुमा पाँच वटा सडकसम्म बन्द गरिएकोमा बुधबार बिहानदेखि त्यसलाई घटाएर सानो क्षेत्रमा मात्र सीमित गरिएको थियो। साँझ ५ बजेपछि धेरैजसो सडक खुला गरिए पनि ४३ औं सडकको केही भाग अझै बन्द नै छ।

जोखिमपूर्ण भवन नजिकै रहेको एउटा होटलमा मानिसहरूलाई बस्न दिइएको छैन। यद्यपि, त्यहाँका पाहुनालाई आफ्नो सामान ल्याउन केही समय भित्र जान दिइएको थियो। स्कटल्याण्डबाट घुम्न आएका मार्गरेट क्लार्क र स्याली ग्रान्टले प्रहरीले एक्कासि बाहिर निकाल्दा आफूहरूले राहदानी, पैसा र औषधि समेत ल्याउन नपाएको गुनासो गरे। उनीहरूले सडकमै रात बिताउनु परेको र यसले आफ्नो बिदा मनाउने योजना नै बिगारेको बताए। बाटो बन्द हुँदा अलपत्र परेकी ९४ वर्षकी एलिनोर रस्किनले भने यस्ता घटनाहरू भइरहने भन्दै यसलाई सामान्य रूपमा लिइन्।