साना नदीमा आकस्मिक बाढीको जोखिम, तटीय क्षेत्रमा सतर्कता अपनाउन आग्रह
काठमाडौं- आज देशका २४ भन्दा बढी जिल्लाका साना नदी र खोलामा पानीको बहाव धेरै बढ्ने र बाढी आउन सक्ने सम्भावना रहेको छ।
बाढी पूर्वानुमान महाशाखाका अनुसार ताप्लेजुङ, सोलुखुम्बु, काठमाडौँ, ललितपुर, भक्तपुर, चितवन, कास्की, कैलाली र कञ्चनपुर लगायतका जिल्लाका खोलाहरूमा आकस्मिक बाढी आउने मध्यम जोखिम छ। विभागका बाढीविद् विनोद पराजुलीले नदी किनारमा बस्ने मानिस, सडक यात्री र निर्माण काममा खटिएकाहरूलाई विशेष सतर्कता अपनाउन आग्रह गरे। लगातारको वर्षाका कारण पहाडी र हिमाली क्षेत्रका नदीमा पनि पानीको सतह बढ्ने भएकाले डुबान र पहिरोको जोखिम बढेको छ।
मौसमविद् डेभिड ढकालका अनुसार कोशी, गण्डकी, लुम्बिनी र सुदूरपश्चिम प्रदेशका केही ठाउँमा अति भारी वर्षाको समेत सम्भावना छ। मनसुन सक्रिय भएकाले नदी किनार र पहिरोको जोखिम भएका ठाउँमा बस्नेहरूलाई सावधान रहन मौसम विभागले भनेको छ।
