मनसुन सक्रिय: देशका धेरै ठाउँमा भारी वर्षाको सम्भावना
काठमाडौं- हाल देशभर मनसुनी वायुको प्रभावका कारण धेरैजसो भूभागमा वर्षा भइरहेको छ। जल तथा मौसम पूर्वानुमान महाशाखाका अनुसार आज दिनभर र राति देशका धेरै ठाउँमा मध्यमदेखि भारी वर्षाको सम्भावना छ।
अहिले कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका केही ठाउँमा हल्कादेखि मध्यम वर्षा भइरहेको छ। महाशाखाका अनुसार आज दिउँसो र राति हिमाली तथा पहाडी भेगका धेरैजसो ठाउँमा मेघगर्जन र चट्याङसहित पानी पर्नेछ।
यस्तै कोशी, बागमती, गण्डकी, कर्णाली, लुम्बिनी र सुदूरपश्चिम प्रदेशका थोरै ठाउँमा भारीदेखि धेरै भारी वर्षाको सम्भावना रहेको मौसमविद्ले बताएका छन्। उच्च हिमाली क्षेत्रका केही ठाउँमा हिमपातको समेत सम्भावना छ।
भारी वर्षाका कारण बाढी, पहिरो र गेग्रान बहावको जोखिम बढ्ने भएकाले आवश्यक सतर्कता अपनाउन महाशाखाले आग्रह गरेको छ। वर्षाका कारण दैनिक जनजीवन, कृषि, पर्यटन तथा सडक र हवाई यातायात प्रभावित हुन सक्ने अनुमान गरिएको छ।
