न्युयोर्कमा डुङ्गा पल्टिँदा आमा र ५ महिने शिशुको मृत्यु, क्याप्टेनविरुद्ध मुद्दा दर्ता
न्युयोर्क- न्युयोर्कस्थित स्ट्याचु अफ लिबर्टी नजिकै डुङ्गा पल्टिँदा २७ वर्षीया सारा सान्चेज र उनकी ५ महिनाकी छोरी एन्टोनेला गार्सियाको मृत्यु भएको छ। यस घटनामा डुङ्गाका क्याप्टेन ४६ वर्षीय म्यानुअल हर्नान्डेजलाई लापरबाहीका कारण मृत्यु भएको अभियोगमा दुई वटा मुद्दा दर्ता गरिएको छ।
अदालती कागजातका अनुसार शनिबार राति भएको उक्त दुर्घटनामा क्याप्टेनको गम्भीर गल्ती देखिएको छ। उनले अनुमति बिना नै भाडामा यात्रु बोकेका थिए। १० जनाको क्षमता भएको डुङ्गामा १४ जनालाई राखिएको थियो र बच्चाका लागि आवश्यक जीवन रक्षक ज्याकेट समेत डुङ्गामा थिएन। साथै, हर्नान्डेजसँग व्यावसायिक रूपमा यात्रु बोक्ने डुङ्गा चलाउने अनुमति पत्र पनि नभएको खुलेको छ।
यात्रा सुरु भएको करिब साढे तीन घण्टापछि क्याप्टेनले डुङ्गालाई मोड्ने क्रममा ठूलो छाल आएर डुङ्गा पल्टिएको थियो। पानीमा खसेका १४ जनामध्ये १२ जनालाई उद्धार गरिएको थियो। तर, पानीबाट निकालिएका आमा र शिशुलाई अस्पताल पुर्याउँदा चिकित्सकले मृत घोषित गरेका थिए।
सोमबार अदालतमा उपस्थित गराइएका हर्नान्डेज ५० हजार डलर धरौटीमा रिहा भएका छन्। यता, मृतक साराका श्रीमान् र उनीहरूको ६ वर्षीय अर्को सन्तानको सहयोगका लागि स्थानीय समुदाय र सहकर्मीहरूले आर्थिक सङ्कलन अभियान सुरु गरेका छन्।
